بيىل الماتى وبلىسىندا پاراپلانەرلىق سپورتتىڭ دالمە-دال قونۋ تۇرىنەن الەم كۋبوگى وتەدى. بۇل تۋرالى شارا ۇيىمداستىرۋشىلارى - ەكسترەمالدى سپورت فەدەراسياسىنىڭ جەتەكشىسى يگور ۆيرشكي، ەكسترەمالدى سپورت فەدەراسياسى جەتەكشىسىنىڭ ورىنباسارى ءسابينا ازامبايەۆا، باپكەر، سپورت شەبەرى يگور كورەنسكييدىڭ قاتىسۋىمەن وڭىرلىك كوممۋنيكاسيالار ورتالىعىندا وتكەن باسپا ءسوز ءماسليحاتىندا بەلگىلى بولدى.

ەكسترەمالدى سپورت فەدەراسياسىنىڭ جەتەكشىسى يگور ۆيرشكيدىڭ سوزىنشە، الەم چەمپيوناتى جوڭعار الاتاۋىندا 4-6 مامىر ارالىعىندا ۇيىمداستىرىلادى. تاۋدىڭ ورنالاسۋى اۋەدە ۇشۋعا قولايلى الاڭ بولىپ تابىلادى. 

«شالعاي ايماقتا الەمدىك دەڭگەيدەگى شارا نەگە وتكىزىلىپ جاتىر دەگەن ساۋال تۋىنداۋى مۇمكىن. ونىڭ باستى سەبەبى 2016 جىلى وڭىردە ازيا چەمپيوناتى، ودان بۇرىن 2015 جىلى ازيا چەمپيوناتى الدىنداعى جارىستىڭ ءوتۋى. حالىقارالىق اەروناۆتيكا قاۋىمداستىعى ءبىزدىڭ ۇشۋ ورىندارىن، سايىستاردى ۇيىمداستىرۋ مەن دايىندىق دەڭگەيىن وتە جوعارى باعالادى. سوندىقتان، مامىر ايىندا الەم كۋبوگىن وتكىزۋ قۇرمەتى ۇسىنىلدى»، - دەپ اتاپ ءوتتى يگور ۆيرشكي.

الەم كۋبوگىندا ءۇندىستان، چەحيا، كورەيا، كوسوۆو، موڭعوليا، كيپر، رۋمىنيا، سەربيا، سلوۆەنيا، تۇركيا، ۋكراينا سياقتى ت.ب. 15 شەت مەملەكەتتەن 100-دەن استام سپورتشى قاتىسادى.

سپورتتىق شارانىڭ سەرىكتەسى بولىپ تابىلاتىن وڭىرلىك كاسىپكەرلەر پالاتاسى حالىقارالىق دەڭگەيدەگى وقيعانىڭ ورىن الۋى ايماقتا اەروتۋريزمنىڭ دامۋىنا جاڭا سەرپىن بەرەتىنىنە سەنىمدى.

جالپى ءىس-شارا ەكسترەمالدى سپورت فەدەراسياسى، قازاقستان اۆياسيالىق سپورتى فەدەراسياسى جانە الماتى وبلىسىنىڭ كاسىپكەرلەر پالاتاسىنىڭ ۇيىمداستىرۋىمەن وتەدى.