ومبۋدسمەن اسقار شاكىروۆ رەسەي فەدەراسياسىنىڭ ومبۋدسمەنى تاتيانا موسكالكوۆاعا توميريس بايسافانىڭ ولىمىنە قاتىستى ءىس ءادىل جۇرگىزىلۋىنە ىقپال ەتۋىن سۇرادى، دەپ حابارلايدى Qamshy.kz اقپارات اگەنتتىگى قازاقستانداعى ادام قۇقىعى جونىندەگى وكىلەتتى اپپاراتىنىڭ باسپا ءسوز قىزمەتىنە سىلتەمە جاساپ.

تەرگەۋ جۇمىستارىن ماسكەۋدىڭ باتىس اكىمشىلىك ايماقتىق تەرگەۋ باسقارماسى جۇرگىزىپ جاتىر.

«اسقار شاكىردىڭ تەرگەۋ ىسىنە قاتىستى كۇمان كەلتىرۋىنە ءتوميريستىڭ اتا-اناسىنىڭ بەرگەن اقپاراتى جانە تەرگەۋ ىسىنە قاتىستى اقپاراتتى بەرۋدەن باس تارتۋى تۇرتكى بولعان. قايتىس بولعان ستۋدەنتتىڭ اتا-اناسى تەرگەۋ ورگاندارىنىڭ كەيبىر ساراپتاما جۇمىستارىن جۇرگىزبەگەنىن بايقاعان. ءتوميريستىڭ اتا-اناسىنىڭ ايتۋىنشا، تەرگەۋ كەزىندە تەك ءبىر عانا كۋاگەر سۇرالعان. سوندىقتان پروسەسسۋالدى شەشىم قابىلدانعانعا دەيىن باق-تا بولعان جاعدايعا قاتىستى ءتۇرلى بولجام ايتىلعان»، - دەلىنگەن اسقار شاكىروۆتىڭ اتىنان تاراعان قازاقستانداعى ادام قۇقىعى جونىندەگى وكىلەتتى اپپاراتىنىڭ مالىمدەمەسىندە.

مارقۇمنىڭ اتا-اناسى – دارحان قوجابەرگەنوۆ پەن جاننا احمەتوۆا رەسەيلىك مامانداردان ادىلەتتى ءارى وبەكتيۆتى تەرگەۋدى تالاپ ەتىپ وتىر. رەسەيلىك تەرگەۋ ماماندارىنىڭ بولجامىنشا، قىز ءوز-وزىن ولتىرگەن. الايدا اتا-اناسى بۇل دەرەككە سەنۋدەن باس تارتتى.

«بۇل ءىستىڭ جۇمباعى كوپ. تەرگەۋ ورگاندارى جاساۋى ءتيىس كەي ارەكەتتەر جاسالماي جاتىر. ماسەلەن، مۋرتۋزالي مەدجيدوۆانىڭ اينالاسى عانا تەرگەلىپ جاتىر. اۋديتوريا ىشىندە قىزىم ەكەۋى عانا بولعان. جىگىت بولمەنىڭ ەسىگىن ۇستەلمەن تىرەپ قويادى. نەگە بۇلاي ىستەگەنى بەلگىسىز. اقىل ەسى دۇرىس ەكى ازامات اۋديتورياعا كىرەدى. ءقازىر بىرەۋى جوق، ال ەكىنشىسى ءتىپتى كۇدىكتى رەتىندە تانىلىپ وتىرعان جوق. ول ءقازىر تەك كۋاگەر ەكەن»، - دەدى اشىندى ءتوميريستىڭ اناسى جاننا احمەتوۆا.

13 ساۋىردە بولعان وقيعاعا سايكەس، كۋاگەرلەر قىزدى بىرەۋدىڭ تەرەزەدەن قۇلاتىپ جىبەرگەنىنە سەنىمدى.

«ول بوستاندىقتا ءجۇر. جارتى كۇن ۇستاپتى دا، جىبەرە سالىپتى. ب ا ق وكىلدەرى العاشىندا قىزىمدى بىرەۋدىڭ يتەرىپ جىبەرگەنىن جارىسا جازعان. بىزگە مىنا تەرگەۋ جۇمىستارى بوگەت كەلتىرىپ وتىر. ولارعا مەدجيدوۆ "قىز ءوزى قۇلادى" دەپ سەندىرگەن. تەرگەۋ ورگاندارى سوعان سەنىپ وتىرعان كورىنەدى. ال قىزىمنىڭ دوستارىنان ەشكىم ەشتەڭە سۇراماعان»، - دەدى جاننا احمەتوۆا.

ەستەرىڭىزگە سالا كەتەيىك، 2018 جىلدىڭ ءساۋىر ايىندا توميريس بايسافا ماسكەۋ مەملەكەتتىك حالىقارالىق قاتىناستار ينستيتۋتىنىڭ 4ء-شى قاباتىنداعى ءدارىسحانانىڭ تەرەزەسىنەن قۇلاپ كەتكەن.

1997 جىلعى توميريس تاڭعى 4.00-تە قايتىس بولدى. تەرگەۋشىلەر ساۋىردە  اتالمىش ىسكە قاتىستى قىلمىستىق ءىس قوزعاعان. تەرگەۋشىلەردىڭ مالىمەتىنشە، قىز بىردەن اۋرۋحاناعا جەتكىزىلگەن. قايعىلى وقيعا 13 ساۋىردە بولدى.

توميريس حالىقارالىق ەكونوميكالىق قاتىناستار كافەدراسىنىڭ 4ء-شى كۋرسىندا وقىعان. ول ءۇزىلىس كەزىندە تەرەزەدەن قۇلاپ كەتكەن. بەيرەسمي اقپاراتقا سايكەس، ونى يتەرىپ جىبەرگەن.