Golden Boy Promotions پروموۋتەرلىك كومپانياسىنىڭ پرەزيدەنتى ەريك گومەس گەنناديي گولوۆكين مەن ساۋل "كانەلو" الۆارەس اراسىنداعى ەكىنشى جەكپە-جەكتى وتكىزۋ مۇمكىندىگى نولگە تەڭ ەكەنىن ايتتى، - دەپ حابارلايدى Vesti.kz.

"ءقازىر وسى جەكپە-جەكتى ۇيىمداستىرۋ مۇمكىندىگى - "ءولى كۇيدە". ولاردان جاۋاپ كۇتەمىز دەپ 5-6 اپتا ۋاقىت جوعالتىپ الدىق. الايدا سونشا ۋاقىتتان كەيىن قايتىپ ورالعاندا، ولاردىڭ كوتەرگەن ماسەلەسى قورلاۋ بولىپ سانالادى. ولاردىڭ سۇرانىستارى تىم كۇلكىلى. ءبىز ارى قاراي جىلجيمىز. مەنىڭشە، گولوۆكين ەكىنشى جەكپە-جەك وتكىزۋگە قورقادى"، - دەپ جازادى BoxingScene گومەستىڭ ءسوزىن.

قازاقستاندىق بوكسشىنىڭ پروموۋتەرى توم لەففلەر كەلىسسوزدەر بارىسىندا تۇسىنسپەۋشىلىكتىڭ نەدەن شىققانىن ايتتى. ونىڭ ايتۋىنشا، باستى ماسەلە - قاراجاتقا كەلىپ تىرەلگەن. بۇل جەردە GGG جەكپە-جەكتەن تۇسكەن تابىستى 50-دە 50 ءبولىسۋدى ۇسىنعان، ال مەكسيكالىق بوكسشى 65 پايىز سۇراپ وتىر. ءبىرىنشى جەكپە-جەكتە گونورار 70-تە 30 بولىپ مەكسيكالىقتىڭ پايداسىنا كوبىرەك شەشىلگەن ەدى.

"گولوۆكيننىڭ بار ايتقانى: "مەن تابىستىڭ 50-دە 50 بولعانىن قالايمىن. مەن چەمپيونمىن". ءبىرىنشى جەكپە-جەكتە بارلىعىنا كوندىك، از پايىزىن الدىق. گولوۆكين ءوزىنىڭ قۇندىلىعىن قانشا دالەلدەسە دە ءبىز قانشاما ۇسىنىستارعا كوندىك. الايدا الۆارەس، نەگە ەكەنى بەلگىسىز، تابىستىڭ كوپ پايىزىن العىسى كەلەدى ەكەن. گەننادييدىڭ ويىنشا،بۇل ءادىل ەمەس. چەمپيون نەبارى 35 پايىز عانا الماۋى ءتيىس"، - دەدى BoxingScene.com لەففلەردىڭ ءسوزىن.

وسىعان دەيىن مەكسيكالىق بوكسشىنىڭ پروموۋتەرى وسكار دە لا حوييا گولوۆكيندى ۇزاق ۋاقىت بويى كۇتە المايتىندارىن جانە باسقا دا كانديداتتاردى قاراستىراتىنىن ايتقان ەدى. ولاردىڭ ءبىرى گولوۆكيننىڭ بۇرىنعى قارسىلاسى - امەريكالىق بوكسشى دەنيەل دجەيكوبس.