كاسىپكەرلەرگە قىزمەت كورسەتۋ ورتالىعىنىڭ (كقكو) اشىلۋى قازاقستان حالقىنىڭ بىرلىگى كۇنىمەن تۇسپا-تۇس كەلىپ، الماتى وبلىسى كاسىپكەرلەر پالاتاسى وڭىرلىك كەڭەسىنىڭ ءتورايىمى ريمما سالىقوۆا، وبلىستىق كاسىپكەرلەر پالاتاسىنىڭ ديرەكتورى ناريمان ءابىلشايىقوۆ، قاپشاعاي قالاسىنىڭ اكىمى تالعات قايناربەكوۆ جانە بيزنەس قوعامداستىق پەن مەملەكەتتىك ورگاندار وكىلدەرىنىڭ قاتىسۋىمەن ءوتتى.

ناريمان ءابىلشايىقوۆتىڭ سوزىنشە، قاپشاعاي قالاسىنداعى كقكو الماتى وبلىسىندا اۋداندىق جانە قالالىق دەڭگەيدە اشىلعان تۇڭعىش ورتالىق بولىپ تابىلادى.

«بۇل ورتالىقتىڭ اشىلۋى قاپشاعاي كاسىپكەرلەرىنە تولىق قىزمەت كورسەتىپ قانا قويماي، بالقاش جانە كەربۇلاق اۋدانىنىڭ كاسىپكەرلەرىنە دە ءتيىستى قىزمەت كورسەتۋگە مۇمكىندىك بەرەدى. اتالمىش كاسىپكەرلەرگە قىزمەت كورسەتۋ ورتالىقتارىن تالعار مەن قاراساي اۋداندارىندا دا اشۋدى جوسپارلاپ وتىرمىز. وسىلايشا، ءبىزدىڭ قىزمەت الماتى وڭىرىندەگى كاسىپكەرلەر ءۇشىن ودان ارى قولجەتىمدى جانە قولايلى بولادى»، - دەپ اتاپ ءوتتى وبلىستىق پالاتا باسشىسى.

كاسىپكەرلەرگە قىزمەت كورسەتۋ ورتالىعىندا «ءبىر تەرەزە» ءپرينسيپى بويىنشا بۋحگالتەرلىك، زاڭگەرلىك، ماركەتينگتىك قىزمەتتەر، مەملەكەتتىك ساتىپ الۋ، كاسىپكەرلىكتى قولداۋعا ارنالعان مەملەكەتتىك باعدارلامالار بويىنشا كەڭەستەر بەرىلەدى.

تاعى ءبىر ايتۋلى جاڭالىق - كاسىپكەرلەرگە قىزمەت كورسەتۋ ورتالىعىندا  مەملەكەتتىك ورگاندار وكىلدەرى كاسىپكەرلەردى ساۋلەت جانە قالا قۇرىلىسى، جەر قاتىناستارى ماسەلەلەرى بويىنشا قابىلداپ، قىزمەت كورسەتەدى. سونىمەن بىرگە كاسىپكەرلەرگە قىزمەت كورسەتۋ ورتالىعى عيماراتىندا «بيزنەس مەكتەپ» كومپونەنتى بويىنشا كاسىپكەرلىك نەگىزدەرىنە وقىتۋ مەن سەمينارلار جۇرگىزىلەدى.

ورتالىق جانىندا قالالىق كاسىپكەرلەر كەڭەسىنىڭ بولمەسى جانە مەملەكەتتىك ورگانداردىڭ قابىلداۋ جۇرگىزۋىنە ارنالعان كاسىپكەرلەردى قابىلداۋ بولمەسى اشىلدى.

وڭىرلىك كەڭەس مۇشەسى، قاپشاعاي قالاسى كاسىپكەرلەر كەڭەسىنىڭ ءتوراعاسى ارتۋر حاچاتريان قالا اكىمدىگىن كقكو قۇرۋداعى قولداۋى ءۇشىن العىسىن ءبىلدىردى.

«جەرگىلىكتى بيلىكتىڭ ءبىزدىڭ باستامالارىمىزدى بەلسەگجى قولداپ كەلە جاتقانى اتاپ وتەرلىك جايت. كاسىپكەرلىكتى قولداۋ ارقىلى قالانىڭ الەۋمەتتىك-ەكونوميكالىق جاعدايىن جوعارىلاتىپ، ءوڭىرىمىزدىڭ بولاشاعىنا سالىم جاسايمىز. سوندىقتان بىرلەسكەن جۇمىس پەن ءوزارا ديالوگ اسا ماڭىزدى»، - دەيدى كاسىپكەر.

ءوز كەزەگىندە قالا اكىمى تالعات قايناربەكوۆ كاسىپكەرلىكتى قولداۋ جۇمىستىڭ اسا ماڭىزدى مىندەتى ەكەنىن اتاپ ءوتتى. قازىرگى تاڭدا قاپشاعايدا 3،6 مىڭنان استام شاعىن جانە ورتا بيزنەس سۋبەكتىسىندە 16،5 مىڭنان استام ادام جۇمىس ىستەيدى.

«كاسىپكەرلەرگە قىزمەت كورسەتۋ ورتالىعىنىڭ قۇرىلۋى قالامىزدا جۇمىس ىستەپ تۇرعان كاسىپكەرلەرگە جانە كاسىپكەرلىك ىنتاسى بار ازاماتارعا قولايلى جاعداي جاساۋعا باعىتتالعان. وسى ورتالىقتا ولار وقىتۋ تۋرالى اقپاراتتان باستاپ ءوز جوباسىن نەمەسە ءىسىن قارجىلاندىرۋعا دەيىنگى ەڭ تولىق، قاجەتتى جانە شىنايى مالىمەتتى الا الادى. سوندىقتان كاسىپكەرلەرگە قىزمەت كورسەتۋ ورتالىعى قاپشاعايداعى كاسىپكەرلىكتىڭ ءتيىمدى دامۋىنا ىقپال ەتەتىنە سەنىمدىمىز»، - دەدى تالعات قايناربەكوۆ.

ايتا كەتەيىك، بيىل كاسىپكەرلەر پالاتاسىنىڭ قاپشاعاي قالالىق فيليالى كاسىپكەرلەرگە 500-دەي سەرۆيستىك قىزمەت پەن كەڭەستەر بەردى. وتكەن جىلى 45 بيزنەس-جوسپار ازىرلەنىپ، ونىڭ 16-ى جالپى سوماسى 72 ملن تەڭگەگە ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا قارجىلاندىرىلدى.

قالالىق فيليالدىڭ قولداۋىمەن 2017 جىلى «بيزنەستىڭ جول كارتاسى - 2020» باعدارلاماسى اياسىندا 28 ملن تەڭگەگە 2 جوبا قارجىلاندىرىلدى جانە 3 جوبا قۇنى 4،5 ملن تەڭگە بولاتىن مەملەكەتتىك گرانتقا يە بولدى. «بيزنەس-كەڭەسشى» جوباسى بويىنشا 36 قاپشاعايلىق بيزنەس وقىتۋدان ءوتتى. ال «ىسكەرلىك بايلانىستار» جوباسى ارقىلى 3 كاسىپكەر شەتەلدە ءوز بىلىكتىلىگىن ارتتىرىپ كەلدى.  

ەسكە سالساق، الماتى وبلىسىنداعى تۇڭعىش تولىقفورماتتى كاسىپكەرلەرگە قىزمەت كورسەتۋ ورتالىعى جىل باسىندا تالدىقورعاندا ىسكە قوسىلعان بولاتىن. تالدىقورعانداعى كاسىپكەرلەرگە قىزمەت كورسەتۋ ورتالىعىندا سەرۆيستىك قىزمەتتەر جانە جارىق، سۋ، گاز جانە جىلۋعا قوسىلۋ بويىنشا تەحنيكالىق شارتتاردى راسىمدەۋ بويىنشا قىزمەتتەر كورسەتىلەدى.