سوڭعى كەزدە الماتى قالاسىن­داعى حالىققا قىزمەت كورسەتۋ ورتالىقتارىنىڭ (حقكو) ءبىرقاتار بولىمشەلەرى بىرتە-بىرتە جابىلا باستادى. اتاپ ايتقاندا، بيىلعى جىلى سۇرانىستىڭ ازايۋى سالدارى­نان شاھارداعى ءتورت بىردەي حقكو بولىمشەلەرى جابىلىپ قالعان. وعان سەبەپ، كەيىنگى ۋاقىتتا الماتىلىقتار اراسىندا ەلەكترون­دى فورماتتى مەملەكەتتىك قىزمەت جۇمى­سىنا سۇرانىستىڭ ارتا باستاعانى بايقا­لىپتى. سودان دا ول قىزمەتكە حالىققا قىزمەت كورسەتەتىن ورتالىقتار قاجەتتىلىگى ازايا باستاعان.

بارىمىزگە بەلگىلى، قازىرگى كەزدە ساندىق تەحنولوگيانىڭ قۇدىرەتى ارتىپ كەلەدى. ويتكەنى، ونىمەن بۇگىندە ادامدار 450-دەن استام ءار ءتۇرلى مەملەكەتتىك قىزمەتتى الا الادى ەكەن. ال وسى رەتتە ءاۋ باستا نەگىزىنەن ساندىق تەحنولوگيامەن جۇمىس ىستەۋ ءۇشىن قۇرىلعان حقكو-نىڭ جۇمىسى بىرتە-بىرتە كەرەكسىز بولىپ بارادى. مىسالى، ستا­تيستي­كا بويىنشا ءقازىر ەلىمىز­دەگى كەيبىر حقكو ءبولىم­شەلەردەگى جۇمىس اۋقىمى ارى كەتسە ورتا ەسەپپەن 20 وپەرا­سيادان اسپاي تۇرسا، ونىڭ ىشىندە، ءتىپتى 5-6 وپە­راسيادان اسپاي­تىندارى دا كەزدەسە باستاعان. بۇل رەتتە ۇيدەن، سونداي-اق، كەڭسەدەن شىقپاستان-اق «Egov.كz» پورتا­لىنان قاجەتتى سۇرانىسىن قانا­عاتتاندىرىپ جاتقان ازاماتتار قاتا­رى كۇن ساناپ ارتىپ كەلە جاتقانىن بايقاپ تا ءجۇرمىز.

وسى رەتتە بيىلعى جىلى عانا الماتى قالاسىنىڭ المالى اۋداندىق №2 حقكو بولىمشەسى (ابىلاي حان داڭعىلى، №74 «ا» ءۇي)، بوستاندىق اۋداندىق №2 حقكو ءبولىم­شەسى (بابايەۆ كوشەسى، №33 ءۇي)، جەتىسۋ اۋدان­دىق №2 حقكو بولىمشەسى («قۇلاگەر» ىقشاماۋدانى، №59 ءۇي) جانە تۇركسىب اۋداندىق №2 حقكو بولىمشەسى جابىلىپ ۇلگەردى.

قورىتا ايتقاندا، ءقازىر الما­تىدا 621 مەملەكەتتىك قىزمەت ۇسىناتىن مەملەكەتتىك كورپورا­سيالاردىڭ 13 مايداندىق-كەڭسەسى جۇمىس ىستەيدى.