الماتى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنا قاراستى المالى اۋداندىق «مۇگەدەكتەردى بەيىمدەۋ جانە وڭالتۋ ورتالىعىنىڭ» ماماندارى «رۋحاني جاڭعىرۋ» باعدارلاماسىن قولداۋ ماقساتىندا، وزدەرىنىڭ قامقورلىعىنداعى مۇمكىندىگى شەكتەۋلى جانداردى تابيعات اياسىنا الىپ شىعىپ، ەلىمىزدىڭ تاريحي جەرلەرىن ارالاتتى، تانىستىردى.

جولاي قالا ورتالىعىنداعى كورىكتى كوشەلەرگە اتى بەرىلگەن ابىلاي حان، قاراساي باتىر، ناۋرىزباي باتىر، قابانباي باتىر، جامبىل، ا.ياسساۋي سىندى تۇلعالاردىڭ ءومىر جولى، تاريحتا قالعان ىزدەرى تۋرالى اڭگىمەلەدىك.

تۋعان جەردى تانۋ ساپارىمىزدى الماتى ىرگەسىندەگى سارىباي بي، قاينازار، ءسۇيىنباي، جامبىل، تۇكتىباي سىندى ارداقتى اتالارىمىز جەرلەنگەن بەس اتا قورىمىنان باستادىق.

بەلگىلى تاريحي تۇلعالاردىڭ ءارقايسىسىنىڭ ومىرىمەن جەكە-جەكە تانىستىق. ساۋلەت ونەرىنىڭ سوڭعى ۇلگىلەرىمەن تۇرعىزىلعان مازارلاردىڭ باسىنا ايالداپ، دۇعا ەتتىك.

سارىباي 19-عاسىردا عۇمىر كەشكەن، ەلىن ىنتىماق-بىرلىككە ۇيىتا بىلگەن ابىز بي بولعان كىسى. مازارىنىڭ ماڭايىندا بوي كوتەرگەن ماۋەلى اعاشتار، ادەمى گۇلدەر كوز تارتادى. تۇكتىباي اتا ماۆزولەيىنىڭ دە الدى تاماشا. ونىڭ ماڭىندا ۇرپاقتارى ءومىر ءسۇرىپ جاتقانىن بىلدىك. ۇرپاقتارىنىڭ قولىندا بۇگىنگى تاڭدا اتالارىنىڭ  حالىقتى ەمدەگەن، دەم بەرگەن قوبىزى ساقتالعان ەكەن. ءسۇيىنباي مەن جامبىل اتالار رۋحىنا دا تاعزىم ەتتىك.

قاينازار – سارىباي ءبيدىڭ داۋىل ماسەلەلەردى شەشۋدە ءادىل دە وڭ قولى بولعان ادام. ونىڭ مازارىن ۇرپاقتارى 2003 جىلى تۇرعىزعان ەكەن. المالى اۋداندىق «مۇگەدەكتەردى بەيىمدەۋ جانە وڭالتۋ ورتالىعىنىڭ» وكىلدەرى وسى مازاردىڭ اينالاسىن كوركەيتۋ ماقساتىندا الماتىدان ارنايى الىپ كەلگەن قۇنارلى توپىراقتارىن سەۋىپ، ءتۇرلى گۇل وتىرعىزىپ، يگىلىكتى ءىس اتقاردى. جاسىل جەلەكتەردى مۇمكىندىگى شەكتەۋلى جانداردىڭ وزدەرى سۋاردى.

قازاق جەرى كەڭ. قۇشاعى دا كەڭ. ءبىز تۋعان جەردىڭ تىنىس-تىرشىلىگىمەن تانىسۋ ارقىلى، تابيعات اياسىندا دا جاقسى دەمالىپ قايتتىق.

بۇل ساپارىمىزدى الدا تاعى دا جالعاستىراتىنىمىز ءسوزسىز.