الماتىداعى №3 ارناۋلى الەۋمەتتىك قىزمەتتەر كورسەتۋ ورتالىعىنىڭ  قۇرىلعانىنا بيىل 15 جىل. بۇگىندە بۇل ورتالىق  جالعىزىلىكتى 300-دەن استام ادامنىڭ تۇراقتى باسپاناسىنا اينالعان. ولاردىڭ ءارقايسىسىنىڭ ءومىر جولى بىر-بىرىنە ۇقسامايدى، ءبىراق بارىنە ورتاق ۇقساستىق – جالعىزدىق. بۇل ورتالىقتا ءقازىر 7 سوعىس ارداگەرى (سەگىزىنشىسى جەڭىس كۇنىنە ەكى كۇن قالعاندا كوز جۇمىپتى)، 3 ارداگەردىڭ جەسىرى، 62 تىل ارداگەرى تۇرىپ جاتىر.

185 قىزمەتكەرى بار ورتالىقتا دا قارتتارعا بارلىق جاعداي جاسالعان. ءبىر ۇيگە قاجەتتى جيھازدارمەن، تۇرمىستىق زاتتارمەن جابدىقتالعان تاپ-تازا جەكە بولمەلەر. اق توسەك. ىستىق سۋ. تەلەديدار. راديو. ءتورت مەزگىل تاماق. جىلى ۇيا.

7000-عا جۋىق كىتاپ قورى بار كىتاپحانانىڭ دا قارتتاردىڭ كۇندەلىكتى ومىرىندە ەرەكشە ورنى بار. مۇندا قاريالار كەز كەلگەن ۋاقىتتا قالاعان كىتابىن وقي الادى، بولمەسىنە اپارىپ وقيمىن دەسە دە ءوز ەركىندە. كومپيۋتەر دە، عالامتور دا بار.

№3 ارناۋلى الەۋمەتتىك قىزمەتتەر كورسەتۋ ورتالىعىنىڭ تۇرعىندارى دا جەڭىس كۇنىن مەرەكەلەدى. ارنايى شاقىرتۋمەن كەلگەن كارىس مادەني ورتالىعىنىڭ «رودينا» ءان-بي ءانسامبلىنىڭ مۇشەلەرى سوعىس الدىنداعى بەيبىت ءومىردى، ومىرگە قۇشتار قىز-جىگىتتەردى، ودان كەيىن ۇلى وتان سوعىسىنىڭ باستالىپ، جىگىتتەردىڭ مايدانعا اتتانعان ساتتەرىن، ازالى ساعاتتاردى ساحنالادى.

وسى ورتالىقتىڭ تۇرعىنى ايىمتورى اپا «انا» مونولوگىن وقىعاندا ۇلكەندەر كوز جاستارىن ءسۇرتىپ، مۇڭايىپ-اق قالدى. كىشكەنتاي ورەندەر اتا-اجەلەرىنە ارناپ «كاتيۋشا» ءبيىن بيلەپ بەردى. «رودينانىڭ» قارت ونەرپازدارى «سينيي پلاتوچەك»، «تەمنايا نوچ»، «جۋراۆلي»، «زەمليا» سىندى ۇلكەن-كىشىنىڭ جۇرەگىنە جول تاپقان، ءالى كۇنگە ءمانىن جوعالتپاعان تاريحي اندەردى ورىندادى. ورتاعا شىعىپ دوڭگەلەنە ۆالس بيلەگەن قارتتار تاماشا كوڭىل-كۇيدە بولدى.

ادەمى كەشتى №3 ارناۋلى الەۋمەتتىك قىزمەتتەر كورسەتۋ ورتالىعىنىڭ ديرەكتورى رايسا سىپابەكوۆانىڭ باستاماسىمەن جۋىردا عانا قۇرىلعان، كوستيۋمدەرى دە ينەنىڭ كوزىنەن جاڭا وتكەن، ءان-جىرعا جاقىن قاريالاردىڭ باسىن بىرىكتىرگەن حوردىڭ ورىنداۋىنداعى «كاتيۋشا»، «جەڭىس» اندەرى تۇيىندەدى.