الاتاۋ اۋدانىندا مەكتەپ وقۋشىلارى اراسىندا حالقىمىزدىڭ ءىنجۋ-مارجانى، ءداستۇرلى ونەرگە قولداۋ كورسەتىلىپ، كونە ونەر تورگە وزدى. ءدال بۇگىنگى داڭعازا، تارس-تۇرس مۋزىكا ساحنانى جاۋلاعان تۇستا ءداستۇرلى ونەرىمىزگە ناسيحات كەرەك-اق. ولاي دەيتىن سەبەبىمىز، ونسىز دا جىلت ەتكەنگە قىزىعىپ، ءاۋ دەگەندى ءان دەپ قابىلدايتىن جاستارعا دۇرىس باعىت بەرىپ، ۇلتتىق ونەرگە بەت بۇرعىزباساق كۇنى ەرتەڭ بۇل كۇنىمىزگە زار بولماسىمىزعا كىم كەپىل؟

سوندىقتان قازاعى قالىڭ، ۇلتتىق ءداس­ءتۇردى قادىرلەي بىلەتىن الاتاۋ اۋدانى كوپكە ۇلگى بولاتىنداي ساۋاپتى ءىستى قولعا الىپ وتىر. «نۇر وتان» پارتياسى الاتاۋ اۋدان­دىق فيليالى «Dastur» جوباسى اياسىندا ءداستۇرلى ءان ورىنداۋشىلار باي­قاۋىن ءوت­كىزىپ، وعان 12 مەكتەپتىڭ ۇمىتكەر­لەرى قاتىس­قان ەدى. حالىق ءانىنىڭ كەرە­مەتتىگى وسىندا بولسا كەرەك. ۇمىتكەر­لەردىڭ ءبىرى دومبىرامەن ءاندى اۋەلەتسە، ەندى ءبىرى وركەستردىڭ سۇيە­مەلدەۋىمەن شالقىتا سالدى. وسىلايشا شىرىن زەينۋللايەۆا باسشىلىق ەتىپ وتىرعان №149 ءبىلىم شاڭىراعان اسەم اۋەن كەرنەپ، ۇلتتىق رۋح  قالىقتادى.

قۇرامىندا «الماتى اقشامى» گازە­ءتىنىڭ باس رەداكتورى، قالالىق ءماس­ليحات دەپۋتاتى قالي سارسەنباي، ءداستۇرلى ءانشى الما امانجولوۆا بار ءادىلقازىلار القاسىنا جەڭىمپازدى انىقتاۋ وڭايعا سوققان جوق.

– ءدال قازىرگىدەي كەزەڭدە ۇلتتىق ونەرگە قولداۋ اۋاداي قاجەت. سوندىقتان ساف ونەردى جاستار اراسىندا ناسيحات­تاپ، وسىن­داي بايقاۋلار وتكىزىپ وتىرساق ءداستۇرلى ونەردىڭ تامىرىنا قان جۇگىرەر ەدى. بۇگىنگى مەكتەپ وقۋشىلارى ەرتەڭگى ەلىمىزدىڭ ءۇمىتىن اقتار بولاشاقتارى. انگە، ونەرگە دەگەن قىزىعۋ­شىلىقتارىنا ريزا بولىپ وتىرمىن، – دەگەن قالي قوش­قار­ۇلى بۇل بايقاۋدىڭ ۇردىسكە اينالاتىنىن جەتكىزدى. بەلگىلى قالامگەر ءوز اتىنان مەكتەپكە 50 كىتاپ سىيعا تارتتى.

– ءداستۇرلى ونەردى دارىپتەيىك. ورازا ايىندا ءادىلقازى بولۋ دا وڭاي ەمەس. بارلىق ونەردى قۇرمەتتەگەن بالانى جەڭىمپاز دەپ ايتار ەدىم، – دەيدى الما امانجولوۆا.

سونىمەن، «جۇزدەن جۇيرىك، مىڭنان تۇلپار» شىققان بايقاۋ جەڭىمپازدارىنىڭ ەسىمدەرى دە بەلگىلى بولدى. ءبىرىنشى ورىندى №180 مەكتەپتىڭ 10-سىنىپ وقۋشىسى سۇلتان شادات كەنەن ازىربايەۆتىڭ «باستا ولەڭ» انىمەن جەڭىپ السا، ەكىنشى ورىنعا №154 مەكتەپتىڭ 6-سىنىپ وقۋشىسى ابسامات سىرىم «جورعاتاي» انىمەن لايىق دەپ تانىلدى. بايقاۋدىڭ ءۇشىنشى ورنى №179 مەكتەپتىڭ 10-سىنىپ وقۋشىسى «ساۋلەم-اي» ءانىن ورىنداعان گۇلسەزىم قارىمساقوۆاعا بۇيىردى.

بارلىق جەڭىمپازدارعا باعالى سىي­لىقتار تابىس ەتىلدى. قورىتىندى ءسوز سويلەگەن «نۇر وتان» پارتياسى الاتاۋ اۋداندىق فيليالى ءتوراعاسىنىڭ ءبىرىنشى ورىنباسارى م.الماسايەۆ جوبانىڭ ماڭىز­دىلىعىن ايتا كەلە، ءداستۇرلى ونەرگە قۇرمەت ءالى دە جالعاساتىنىن جەتكىزدى.