الماتى قالاسىنىڭ مۇراجايلارىندا «رۋحاني جاڭعىرۋ» باعدارلاماسى اياسىندا حالىقارالىق مۋزەيلەر كۇنىنە ارنالعان «مۇراجاي ءتۇنى» اتتى مەرەكەلىك شارا ءوتتى. داستۇرگە اينالعان مۇراجاي مەرەكەسى بيىل دا الماتىلىقتارعا كوپتەگەن توسىن سىيلاردى تارتۋ ەتتى. «الماتى قالاسى مۋزەيلەر بىرلەستىگىنىڭ» التى مۋزەيى – الماتى مۋزەيى، د.ا.قونايەۆ مۋزەيى، ن.تىلەندييەۆتىڭ مەموريالدىق مۋزەيى، س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنى، ىقىلاس اتىنداعى حالىق مۋزىكالىق اسپاپتار مۋزەيى مەن مۋلتيمەديالىق ءداستۇرلى مۋزىكا ورتالىعى كورەرمەندەرگە تاقىرىپتىق كورمەلەر، شەبەرلىك ساباقتار، كۆەست ويىندار، بايقاۋلار، كونسەرتتىك باعدارلامالار، تەاترلاندىرىلعان قويىلىمدار، ارنايى مادەني-تانىمدىق باعدارلامالار دايىندادى.
الماتى مۋزەيىنىڭ زالدارى تاريحي وقيعالاردى، سول ءداۋىردىڭ كيىمدەرى مەن تۇرمىس-تىرشىلىگىن ينتەراكتيۆتى تۇردە كەلۋشىلەر نازارىنا ۇسىندى. مەرەكەلىك شارادا كورەرمەندەر «جاندى مۋزەي» ەكسپوزيسياسىندا م.اۋەزوۆ اتىنداعى قازاق مەملەكەتتىك اكادەميالىق دراما تەاترى، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى جانە مەملەكەتتىك قۋىرشاق تەاترى ارتىستەرىنىڭ تاريحي تۇلعالاردى سومداعان تەاترلاندىرىلعان قويىلىمدارىن تاماشالادى. كورەرمەندەر «التىن حانشايىم» جانە «حح عاسىر باسىنداعى جەتىسۋ ءوڭىرى: ءدورد ءالماشيدىڭ مۇراعاتىنان» اتتى مۇراجاي كورمەلەرىمەن تانىستى. بۇل ءتۇنى مۋزەي ەكسپوزيسياسى بويىنشا «مۇراجاي قازىناسى» اتتى كۆەست ۇيىمداستىرىلدى.
***
ىقىلاس اتىنداعى حالىق مۋزىكالىق اسپاپتار مۋزەيىندە حالىقارالىق مۋزەيلەر كۇنىنە وراي «عاسىرلار ءۇنى» اتتى شارا ءوتتى. مەرەكەلىك شارا شەڭبەرىندە قۇرمانعازى اتىنداعى قازاق ۇلتتىق كونسەرۆاتورياسىنىڭ، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ جانە ج.ەلەبەكوۆ اتىنداعى رەسپۋبليكالىق ەسترادا جانە سيرك كوللەدجىنىڭ ستۋدەنتتەرى «التىباقان» اياسىندا تەاترلاندىرىلعان قويىلىمىن ساحنالادى. اسەم انمەن ارلەنگەن، كۇمبىرلەگەن كۇيمەن كومكەرىلگەن «عاسىرلار ءۇنى» اتتى گالا-كونسەرت جۇرتشىلىقتىڭ جۇرەگىنە عاسىرلار سازىن جەتكىزدى.
مۇراجاي تۇنىندە «ۇلت رۋحانياتىن جاساۋشىلار» اتتى دەرەكتى ءفيلمنىڭ كورسەتىلىمى بولدى. مۋزەيدىڭ مەموريالدىق مۋزىكالىق اسپاپتار زالىندا مۋزىكالىق اسپاپتارى ساقتالعان كەنەن ازىربايەۆ، نۇرعيسا تىلەندييەۆ، جۇسىپبەك ەلەبەكوۆ، دينا نۇرپەيىسوۆا، ماعاۋيا حامزين ءتارىزدى ونەر تۇلعالارىنىڭ كونە حرونيكالىق بەينەتاسپالارى كورسەتىلدى.
سونداي-اق، بۇل كەشتە مۋزىكالىق اسپاپ جاساۋشى شەبەرلەردىڭ كورمە-جارمەڭكەسى ءوتتى.
***
د.ا.قونايەۆ مۋزەيىندە «كوشەلەر سىر شەرتەدى» اتتى ەكسكۋرسيا، «قونايەۆتاردا شاي ءىشۋ» اكسياسى، مۇراجاي بويىنشا ەكسكۋرسيا سونداي-اق، «ەكسپوناتتى تاپ» اتتى كۆەست-ويىنى ۇيىمداستىرىلدى.
***
ن.تىلەندييەۆتىڭ مەموريالدى مۇراجايىندا ت.ءجۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى «مەنىڭ اتىم قوجا» فيلمىنەن ءۇزىندى قويدى.
***
س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىندە وتكەن ىزگى شارا تاۋداي تۇلعالاردىڭ عيبراتتى عۇمىرى مەن شىعارماشىلىق جولىن ناسيحاتتاۋ ماقساتىن كوزدەدى. جاستار اراسىندا وتكەن «تانىس ءھام بەيتانىس بەينەلەر» اتتى كۆەست ويىنى قازاقتىڭ اقىن-جازۋشىلارىنىڭ ونەگەلى ءومىرى مەن شىعارماشىلىق باي مۇراسىن ناسيحاتتاۋدى مۇرات تۇتتى. «اسقاقتاي بەر، ارۋ قالا استانا!» اتتى سۇراق-جاۋاپ سايىسى جاستاردىڭ دۇنيە-تانىمىن تەرەڭدەتىپ، كوڭىل كوكجيەگىن كەڭەيتتى. «…جاقسى ءان مەن ءتاتتى كۇي» سازدى باعدارلاماسىندا ت.جۇرگەنيەۆ اتىنداعى قازاق ۇلتتىق ونەر اكادەمياسى كوللەدجىنىڭ جانە قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى اسەم ءان مەن ءتاتتى كۇيدەن شاشۋ شاشتى.
پىكىر قالدىرۋ