بوكستان الەم جانە ازيا جەڭىمپازدارى مەن جۇلدەگەرلەرى الماتى قالاسى اكىمدىگىنىڭ قولداۋىمەن ىسكە قوسىلعان «باتىل بول» جوباسى اياسىندا جاعدايى تومەن وتباسىدان شىققان بالا­لارعا شەبەرلىك ساباق وتكىزدى.

سپورتتىق شارا ناۋرىزباي اۋدانىندا ورنالاسقان سپورت كەشەن­دەرىنىڭ بىرىندە بوكس فەدە­راسياسى وكىلدەرى، وسى جوبانىڭ ديرەكتورى مۇحتار تۇرسىنوۆ جانە الماتى قالاسى دەنەشى­نىقتىرۋ جانە سپورت باسقارما­سىنىڭ وكىلى نۇربەك مارس ۇلىنىڭ قاتىسۋىمەن ءوتتى.

50-دەن استام بالالار جاڭا جاتتىعۋلارمەن تانىسىپ، اتاقتى بوكسشى قىزدار نازىم قىزايباي، بالنۇر بولاتبەك، رانو پاركا­توۆا، ارايلىم ماياسار جانە «استانا ارلانس» بوكسشىلارى داستان بەكەن، سۇلتان ابدراي­موۆ، بەكجان اسقانبايمەن بىرگە ءوز شەبەرلىكتەرىن بايقادى. بار­لىق قاتىسۋشىلار كوتەرىڭكى كوڭىلدە بولىپ، قۋانىشتارىن جاسىرمادى.

– ماعان بۇل شەبەرلىك ساباعى قاتتى ۇنادى. نازىم قىزايباي مەن ۇلگى تۇتاتىن سپورتشىلاردىڭ ءبىرى. ءوزىم سول كىسى جانە گەنناديي گولوۆكين مەن قانات يسلام سەكىل­ءدى بولعىم كەلەدى. ءوزىم بوكسپەن اينالىسىپ جۇرگەنىمە 6 اي بولدى، بىرنەشە جارىستارعا قاتىسىپ، بىرەۋىندە قولا الدىم، – دەيدى 10 جاسار ماردەن ەسەن.

بۇل پيلوتتىق جوبانىڭ باستى ماقساتى – جاعدايى تومەن جانە كوپبالالى وتباسىدان شىققان مەكتەپ جاسىنداعى بالالاردى شاحمات، بوكس، قازاق كۇرەسى جانە توعىزقۇمالاق سپورتىن تەگىن ۇيرەتۋ بولىپ تابىلادى. جوبا ازىرشە ناۋرىزباي اۋدانىندا ىسكە قوسىلعان.

– ءقازىر بىزدە  6-دان 17-جاسقا دەيىنگى 800 بالا بار. وسى ءتورت سپورت ءتۇرىنىڭ ىشىندە سۇرانىسقا شاحمات سپورتى يە. وندا 350-دەن استام ادام وقيدى. بارلىعىن ءوز ىستەرىنىڭ ماماندارى دايىندايدى. ءبىز ەندى قازىرگى كورسەتكىشتى ءوسىرىپ، جىلدىڭ  سوڭىنا دەيىن جاقسى ءناتي­جەگە قول جەتكىزەمىز دەپ ويلايمىن، – دەيدى «باتىل بول» جوباسىنىڭ ديرەكتورى مۇحتار تۇرسىنوۆ.

ءوز كەزەگىندە ۇيىمداس­تىرۋ­شىلار بارلىق قاتىسۋشىلار مەن سپورتشىلارعا سىيلىقتار جانە ديپلومدار سىيلادى. ەكى دۇركىن الەم چەمپيونى نازىم قىزاي­بايدىڭ  ايتۋىنشا، وسىنداي شەبەرلىك ساباقتار ءجيى ءوتىپ تۇرسا،  بالالاردىڭ جەڭىسكە دەگەن جىگەرى ارتادى دەيدى.

– وسى بالالار اراسىندا بولا­شاقتا ءبىز سياقتى چەمپيون­دار وسەدى دەپ ويلايمىن. قالا اكىمدىگىنىڭ بۇل باستاماسى وتە كەرەمەت، مەن ريزامىن، – دەپ نازىم قىزايباي ءوز ويىن ءبىلدىردى.

ايتا كەتەر ءجايت، الماتى قالاسى اكىمدىگىنىڭ قولداۋىمەن ناۋرىز ايىنىڭ باسىندا قۇرىل­عان «باتىل بول» جوباسىنىڭ باستى ماقساتى – جاعدايى تومەن جانە كوپبالالى وتباسىدان شىق­قان بالالار مەن ءجاسوسپى­رىمدەردى سالاۋاتتى ءومىر سالتىنا بەيىمدەپ، ولاردىڭ  اراسىندا دارىندى سپورت­شىلاردى انىقتاۋ بولىپ تابىلادى.