وڭتۇستىك قازاقستان وبلىسى ماقتارال اۋدانىنىڭ اكىمى دجيۋ-دجيتسۋ بويىنشا الەم كۋبوگىندا كۇمىس جۇلدەگەر اتانعان تولەگەن اتكۋلوۆتى قابىلدادى.

جاقىندا عانا پاناما رەسپۋبليكاسىنىڭ استاناسى پاناما قالاسىندا وتكەن سپورتتىڭ دجيۋ-دجيتسۋ تۇرىنەن الەم كۋبوگىندا كۇمىس جۇلدەگەر اتانعان تولەگەن اتاكۋلوۆ اۋدان اكىمى جامانتاي بەيسەنبايەۆتىڭ جەكە قابىلداۋىندا بولدى. سپورتشىمەن جەكە جۇزدەسكەن اۋدان باسشىسى ونى جەتىستىگىمەن قۇتتىقتاپ، ارنايى ماراپاتتادى.

"ماقتارالدان شىعىپ ەلىمىزدىڭ اتىن الەمگە تانىتىپ جاتقان سەن سياقتى سپورتشىلارىمىز كوپ بولسىن. الداعى ۋاقىتتا بۇدان دا بيىك شىڭداردى باعىندىرۋىڭا تىلەكتەسپىن!" - دەپ اۋدان باسشىسى ىزگى تىلەگىن ايتتى.

تولەگەن اتاكۋلوۆ 1992 جىلى ماقتارال اۋدانىندا تۋىلعان. 2011 جىلى الماتى قالاسىنداعى رەسپۋبليكالىق مامانداندىرىلعان سپورت مەكتەبىنە وقۋعا ءتۇسىپ، 2014 جىلى اياقتادى.

2015 جىلدان باستاپ سپورتتىڭ دجيۋ-دجيتسۋ تۇرىمەن اينالىسىپ، قازاقستان رەسپۋبليكاسىنىڭ بىرنەشە دۇركىن چەمپيونى اتانادى. سونداي-اق، 2016 جىلى ەرەجەسىز جەكپە-جەكتەن "الاش پرايد" دوداسىنىڭ جەڭىمپازى بولعان.

ايتا كەتەيىك، جاقىندا عانا پاناما رەسپۋبليكاسىنىڭ استاناسى پاناما قالاسىندا وتكەن دجيۋ-دجيتسۋ بويىنشا الەم كۋبوگىندا تولەگەن اتاۋلوۆ كۇمىس جۇلدەگەر اتانىپ، ەلىمىزدىڭ ابىرويىن اسقاقتاتتى.