بالا قۇقىقتارى جونىندەگى ۋاكىل زاعيپا بالييەۆا وقو-داعى زورلاندى دەگەن بالانىڭ ىسىنە قاتىستى پىكىر ءبىلدىردى.
ءوز سوزىندە بالييەۆا جۋرناليستەر مەن قوعامنان بۇل ماسەلەنى قازبالاي بەرمەۋلەرىن ءوتىندى.
«وقو-داعى بالاعا قاتىستى – مەن بۇل تاقىرىپتى قايتا-قايتا قازبالاي بەرمەۋلەرىڭىزدى سۇرايمىن. قازىرگى ۋاقىتتا تەرگەۋ ءجۇرىپ جاتىر. تارازدىق جاسوسپىرىمگە قاتىستى ءىس تە قارالىپ جاتىر. ول ىسكە باس پروكۋراتۋرا ارالاسىپ، ىسپەن تانىسۋ ۇستىندە. ءىس ناتيجەلەرىن ءوزىمىز سىزدەرگە حابارلايمىز»، - دەدى ومبۋدسمەن بالالاردىڭ قۇقىعىن قورعاۋ ماسەلەسىنە ارنالعان يۋنيسەف كونفەرەنسياسىنىڭ ۇزىلىسىندە.
ايتا كەتەيىك، وڭتۇستىك قازاقستان وبلىسىنىڭ جەتى جاسار تۇرعىنىنا بايلانىستى وقيعا قوعامدىق رەزونانس تۋدىرعان ەدى. مەكتەپ وقۋشىسىنىڭ اجەسى نەمەرەسىنىڭ زورلانىپ كەلگەنىن ايتىپ، قوعامنان كومەك سۇراعان.
ال سارىاعاش اۋداندىق ءبىلىم ءبولىمى سوت-مەديسينالىق ساراپتاماسىنىڭ اتالمىش فاكتىنى جوققا شىعارعانىن ايتىپ اقتالدى. الايدا ساراپتاما ناتيجەسىنە بەلسەندىلەر مەن ەرىكتىلەر كۇمان كەلتىرىپ، ءىستىڭ تەرگەلۋىن تالاپ ەتتى. تەرگەۋ شارالارىنا قازاقستاندىق جانە شەتەلدىك ساراپشىلار كىرىستى. بالا مەن اجەسى جانە اناسى قازىرگى ۋاقىتتا مەملەكەت قورعاۋىندا.
