وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ سارىاعاش اۋدانىنداعى ساپارى كەزىندە اۋەلى كوكتەرەك كەنتىندەگى شيپاجايلار اۋماعىندا ورنالاسقان «اسەم-اي» مينەرالدى سۋسىن وندىرەتىن زاۋىتتىڭ جۇمىسىمەن تانىستى. قازىرگى تاڭدا كاسىپورىن ساعاتىنا 20 مىڭ دانا ءونىم وندىرەدى. 8 گەكتار اۋماقتا ورنالاسقان زاۋىتتا بۇگىندە 80-گە جۋىق ادام جۇمىس ىستەيدى.

اۋداننىڭ وندىرىستىك قۋاتى مەن تۋريستىك الەۋەتىن تانىستىرعان ايماق باسشىسى قايرات ابدۋالييەۆ بۇگىندە قازاقستاننان بولەك، كورشى مەملەكەتتەردەن سارىاعاش ءوڭىرىنىڭ شيپالى سۋىن ىزدەپ كەلەتىن تۋريستەر سانى ارتىپ كەلە جاتقاندىعىن ايتتى.

«2018 جىلدىڭ ءى توقسانىنىڭ وزىندە سارىاعاش اۋدانىنا كەلۋشىلەر سانى 34 100 ادامدى قۇراپ، وتكەن جىلدىڭ ءتيىستى كەزەڭىمەن سالىستىرعاندا 21،1 پايىزعا ارتىپ وتىر.  قازىرگى تاڭدا سارىاعاش اۋدانىندا 20 قوناق ءۇي، 12 مادەني-تاريحي نىسان، 1 بالالار شيپاجايى مەن لاگەرى جانە 26 ەمدىك-ساۋىقتىرۋ ورتالىعى قىزمەت كورسەتەدى. 2018 جىلدىڭ ءى توقسانىندا اۋداندا 2 شيپاجاي ىسكە قوسىلسا، جالپى 2018-2023 جىلدارى ارالىعىندا 9 شيپاجاي سالۋ جوسپارلانىپ وتىر»، - دەدى قايرات امانكەلدى ۇلى.

وبلىس اكىمى شيپاجايلاردىڭ سانىن كوبەيتۋدە اۋەلى دەمالۋشىلارعا قاجەتتى جاعداي جاساۋ كەرەكتىگىن جەتكىزدى.

«سارىاعاش وڭىرىندە ءتۋريزمدى دامىتۋ ءۇشىن اۋداننىڭ الەۋەتى جەتەدى. مۇندا تورتكۇل دۇنيەگە بەلگىلى شيپالى سۋى بار، ينفراقۇرىلىم ماسەلەسى شەشىلگەن. ارينە شيپاجايلار سانىنىڭ ارتقاندىعى كەلۋشىلەردىڭ كوبەيگەندىگىن كورسەتەدى. ماسەلەن، بۇگىنگى تاڭدا وبلىس بويىنشا 190 قوناق ءۇي، 44 شيپاجاي، 61 دەمالىس ايماعى، 19 بالالار ساۋىقتىرۋ لاگەرى جانە 104 تۋريستىك ۇيىم بار. باستىسى، اتالعان ورىنداردا كەلۋشىلەرگە جوعارى قىزمەت كورسەتۋ ساپاسىن نازاردا ۇستاۋ قاجەت»، - دەدى جانسەيىت تۇيمەبايەۆ.

سونداي-اق، اعىمداعى جىلى وڭتۇستىك قازاقستان وبلىسىندا تۋريزم سالاسىندا «سيفرلىق قازاقستان» مەملەكەتتىك باعدارلاماسىن جۇزەگە اسىرۋ ماقساتىندا جول كارتاسى بەكىتىلگەن بولاتىن. وسى رەتتە وبلىستىڭ 35 تانىمال تۋريستىك نىسانىندا حالىقارالىق ستاندارتقا سايكەس سيفرلىق QR ءتولقۇجاتتار ورناتىلعان. وسى ءتولقۇجاتتار ارقىلى كەلۋشى تۋريستەر نىسان بويىنشا 6 تىلدە جىلدام ءارى ىڭعايلى اقپارات الۋعا مۇمكىندىگى بار.