ەلباسىمىز نۇرسۇلتان ءابىش ۇلى نازاربايەۆتىڭ  «بولاشاققا باعدار: رۋحاني جاڭعىرۋ»  باعدارلامالىق ماقالاسىن قالىڭ ەلدىڭ اراسىندا كەڭىنەن ناسيحاتتاۋ جانە تاۋەلسىز ەلىمىزدىڭ تىرەگى - استانا قالاسىنىڭ 20 جىلدىعى اياسىندا داستۇرگە اينالعان  «وتىرار تالانتتارى-2018» Vءىى حالىق ونەر فەستيۆالى ءوتتى.

ونەر بايقاۋى -  وتىراردىڭ شىن مانىندە ۇلىلار مەن دارىندى عۇلامالاردىڭ، ونەر دۇلدۇلدەرىنىڭ وتانى ەكەندىگىن دالەلدەي تۇسكەندەي. 

فەستيۆالگە اۋداننىڭ  13 اۋىل وكرۋگتەرىندەگى تالانتتار ونەر سايىسىنىڭ ەرەجەسىنە سايكەس 15 جانر بويىنشا ءوز ونەرلەرى مەن تۋىندىلارىن ورتاعا سالدى.

العاشقى ىرىكتەۋ كەزەڭىنە  500-دەن استام ونەرپاز قاتىسسا، ولاردىڭ اراسىنان ىرىكتەلىپ شىققان 200-گە جۋىق ونەرلى جاندار اقتىق كەزەڭدە ب ا ق سىنادى.

اتالعان بايقاۋدان قانشاما وتىرارلىقتار جارقىراي شىعىپ، رەسپۋبليكاعا تانىمال ونەر جۇلدىزىنا اينالعانى بەلگىلى.

ايماق ءۇشىن ءتول ونەر مەرەكەسىن اۋدان اكىمى ەرلان ايتاحانوۆ قۇتتىقتاۋ سوزبەن اشىپ بەردى.   «كونە وتىرار وركەنيەتىن قايتا جاڭعىرتىپ، جاس تالانتاردىڭ باعىن اشقان بايقاۋدا  وتىرارلىق سەرىك سەيىتمان، دوسحان ودامانوۆ، ساعىنتاي قۇتتىباي، داۋرەن پولاتبايەۆ، ەركەعالي ماحمۋتحانوۆ، داۋرەن اقساقالوۆتارداي بىرنەشە تالانتتى جاستار ونەر كوكجيەگىنە قانات قاعىپ،  ونەر ساحناسىندا اق باتاسىن العان بولاتىن. اتالعان جاس ورەندەرىمىز بۇگىندە حالىقارالىق كونكۋرستاردا جەڭىمپاز اتانىپ، ەلىمىزدىڭ ابىرويىن اسقاقتاتۋدا. بۇگىنگى بايقاۋدى جەڭىپ شىققان جۇيرىكتەردىڭ ىشىنەن دە ۇلتىمىزدىڭ ونەرى مەن مادەنيەتىن العا سۇيرەپ، الەمگە تانىتاتىن دارابوزدار شىعاتىندىعىنا كامىل سەنەمىن» - دەدى، ە.ايتاحانوۆ.

ق ر ەڭبەگى سىڭگەن قايراتكەرى، انشى-كومپوزيتور مارات وماروۆ ءتوراعالىق ەتكەن قازىلار القاسىنىڭ قۇرامىندا قازاقستاننىڭ حالىق اقىنى اسەلحان قالىبەكوۆا، ش.قالداياقوۆ اتىنداعى وبلىستىق فيلورمونيانىڭ ءانشىسى اينۇر نۇراشوۆا، تالانتتى اكتريسا جۇلدىزاي دۇيسەنبييەۆا، رەسپۋبليكالىق، حالىقارالىق بايقاۋلاردىڭ جەڭىمپازى مارحابات بەيسەنوۆا، ق ر ەڭبەگى سىڭگەن قايراتكەرى، «دارىن» مەملەكەتتىك جاستار سىيلىعىنىڭ جانە «ق ر تۇڭعىش پرەزيدەنتى-ەلباسى قورى» سىيلىعىنىڭ لاۋرەاتى ازامات جىلتىركوزوۆتەر مەن وبلىستىق مادەنيەت جانە حالىق شىعارماشىلىعى ورتالىعى ديرەكتورىنىڭ ورىنباسارى بەرىك جورابەكوۆتەردىڭ بولۋى بايقاۋدىڭ ماڭىزدىلىعىن ارتتىرا ءتۇستى.

سوندا دا بولسا جۇزدەن جۇيرىك شىققان ناعىز تالانتتىلار ونەر بايگەسىندە بەلگىلەنگەن قاتاڭ ەرەجەدەن قايمىقپاستان ءوز ونەرلەرىن پاش ەتتى. ناتيجەسىندە جۇلدەگەرلەر مەن جەڭىمپازدار ارنايى دايىندالعان ديپلومدار مەن قارجىلاي سىي-سياپاتتارعا يە بولدى. 
سونداي-اق، اۋداندا ۇيىمداستىرىلعان  «ونجىلدىقتار توعىسىندا» اكسياسىنا ءوز ۇلەستەرىن قوسىپ، جومارتتىق تانىتقان ءبىر توپ وتىرارلىقتار اۋدان اكىمىنىڭ العىس حاتىمەن ماراپاتتالدى.

فەستيۆالدىڭ سوڭى رەسپۋبليكاعا تانىمال ونەر جۇلدىزدارىنىڭ گالا-كونسەرتىنە ۇلاسىپ، كورەرمەندەرگە كەرەمەت كوڭىل-كۇي سىيلادى.