يمانعالي تاسماعامبەتوۆ ەۋروپالىق بيزنەسمەندەردى ەۋرازيالىق ترانسپورت ءدالىزىنىڭ مۇمكىندىگىن پايدالانۋعا شاقىردى، دەپ حابارلايدى Qamshy.kz اقپارات اگەنتتىگى. 

قازاقستان رەسپۋبليكاسىنىڭ توتەنشە جانە وكىلەتتى ەلشىسى يمانعالي تاسماعامبەتوۆ رەسەي ەلىندەگى گەرمانيا فەدەراتيۆتى رەسپۋبليكاسىنىڭ ۇيىمداستىرۋىمەن ەكونوميكالىق باعىتتا وربىگەن "ەۋروپالىق كەڭەس – ەۋرازيالىق ەكونوميكالىق وداق" اتتى پىكىر تالاس الاڭىنا قاتىستى.

وسى جيىندا ءسوز سويلەگەن ەلشى مىرزا، ەۋرازيالىق ەكونوميكالىق وداقتىڭ نەگىزى قالانىپ، ونىڭ ءارى قارقىن الۋى ەڭ الدىمەن قازاقستان پرەزيدەنتى نۇرسۇلتان نازاربايەۆتىڭ ارقاسىندا بولعانىن ەرەكشە اتاپ ءوتتى.

"ەۋروپالىق وداق قالىپتاسقان ءۇردىس بويىنشا ەۋرازيالىق ەكونوميكالىق وداقتىڭ ساۋدا-ساتتىق سالاسى بويىنشا نەگىزگى سەرىكتەسىنە اينالعان. ەەو ەلدەرى ەۋروپالىق وداقتىڭ سىرتقى ساۋدا كولەمى بويىنشا 50 %-دان جوعارى ۇلەسىن يەلەنۋدە"،-دەدى يمانعالي تاسماعامبەتوۆ.

تەحنولوگيالاردىڭ بەلەڭ الىپ، تاۋارلاردىڭ نارىققا تۇسپەي جاتىپ كونەرەتىن زامانىندا قالىپتاسقان جۇيە بويىنشا جۇمىس ءتۇزۋ مۇمكىن ەمەس. سول سەبەپتى تاۋارلاردى جەتكىزۋ كەزىندە ونىڭ وزىندىك قۇنىنا قاراعاندا تاسىمالىنا كەتەتىن ۋاقىت شىعىنىن ەسەپتەۋ الدەقايدا ماڭىزدى.

وسى رەتتە، ەۋروپا مەن ازيانى قوساتىن، ءشولدى دالامەن وتەتىن ترانسەۋرازيالىق جولدىڭ سۋ قاتىناسىنان ارتىق ەكەنىن ەلشى قاداپ ايتتى.

"قازاقستان بۇعان تولىعىمەن ءازىر. ەلىمىزدە مەملەكەتتىك باعدارلاما تۇگەلىمەن جۇزەگە اسىپ وتىر. 26 جىلدىڭ ارالىعىندا 10 مىڭ شاقىرىم جول جاڭارتىلىپ، جوندەلدى. جۋىردا 8000 شاقىرىم اۆتوجول قولدانىسقا بەرىلەدى. مۇنىمەن قاتار، 2،5 مىڭ شاقىرىم تەمىر جول ىسكە قوسىلدى"،-دەدى يمانعالي تاسماعامبەتوۆ.

پىكىر تالاس الاڭىندا ەۋرازيالىق ەكونوميكالىق وداق – ساۋدا ساتتىق ساياساتىنىڭ ۇستانىمى" اتتى ساراپتامالىق جۇمىس كوپشىلىك نازارىنا ۇسىنىلدى. وندا كوپتەگەن قاجەتتى اقپارات مەن مالىمەتتەر جيىنتىعى بەرىلگەن.