قارۋلى كۇشتەرگە قاراستى راديوەلەكترونيكا جانە بايلانىس-اسكەري ينجەنەرلىك ينستيتۋتىندا ءبىتىرۋشى تۇلەكتەرى ءۇشىن مەملەكەتتىك اتتەستاسيالىق ەمتيحان باستالدى. وفيسەرلەر قۇرامىنان تاعايىندالعان كوميسسيا مۇشەلەرى ءوز جۇمىستارىنا كىرىسىپ تە كەتتى. ينستيتۋت باستىعى پولكوۆنيك اسقار مۇستابەكوۆ ءار ءبىتىرۋشى تۇلەك ەرتەڭگى كۇنى كوماندير اتانىپ، جەكە قۇرام الدىندا ۇيرەنگەنىمەن بولىسەتىنىن جانە ادام ومىرىنە، اسكەري تەحنيكاعا، تاۋەلسىزدىك تۇعىرىنا جاۋاپتى ەكەندىكتەرىن ەسكەرتە كەلە، سىن ساعاتتا سىننان سۇرىنبەي وتۋلەرىنە تىلەكتەستىگىن جەتكىزدى. كۋرسانتتار بەلگىلەنگەن كۇنى تاڭداعان ءپانى مەن دەنە دايىندىعى بويىنشا مەملەكەتتىك ەمتيحان تاپسىرىپ، ديپلومدىق جۇمىستارىن قورعايدى.

بيىل ينستيتۋت قابىرعاسىندا 214 ءبىتىرۋشىنىڭ 42ء-سى وقۋ ۇزدىگىنە، 12ء-سى وقۋ ۇزدىگىنىڭ ءتوس بەلگىسىنە ۇمىتكەر. سالىستىرمالى تۇردە 2017 جىلى وقۋ ۇزدىگى 32 بولسا، وقۋ ۇزدىگىنىڭ ءتوس بەلگىسىن 4 ءبىتىرۋشى تاققان بولاتىن. ينستيتۋتتا ءبىلىم بەرەتىن وقىتۋشى-پروفەسسورلار قۇرامىنىڭ قاجىرلى ەڭبەكتەرىنىڭ ناتيجەسىندە ءبىلىم بەرۋ ساپاسى ارتىپ، وقۋ ۇزدىكتەرىنىڭ سانى ەسەلەندى.

ءبىلىم مەن سپورتتى، ونەر مەن زياتكەرلىكتى قاتار سەرىك ەتىپ، جوعارى جەتىستىكتەرگە جەتكەن كۋرسانتتار دا جەتەرلىك. بەس جىل ىشىندە 214 كۋرسانتتىڭ 186 ءارتۇرلى ساناتتا سپورتتىق دارەجەگە قول جەتكىزدى. ولادىڭ 4-ەۋى سپورت شەبەرى اتانسا، 7-ەۋى سپورت شەبەرلىگىنە ۇمىتكەر. سولاردىڭ ءبىرى كۋرسانت ا.راقىمجانوۆ وقۋدا وزات اتانىپ، وقۋ ۇزدىگىنىڭ ءتوس بەلگىسىنە ۇمىتكەرلىگىمەن قوسا دزيۋدو مەن قازاقشا كۇرەستەن سپورت شەبەرلىگىن قورعاپ، رەسپۋبليكامىزدىڭ بىرنەشە دۇركىن چەمپيونى اتاندى. كۋرسانت ا.بايسالبايەۆ تمد قارۋلى كۇشتەرىنىڭ اراسىندا وتكەن گىر تاسىن كوتەرۋ سايىسىنىڭ ەكى دۇركىن كۇمىس جۇلدەگەرى، قازاقستان رەسپۋبليكاسىنىڭ ءۇش دۇركىن چەمپيونى اتانىپ، سپورت شەبەرى اتاعىن قورعادى. سونىمەن قاتار، وقۋ ۇزدىكتەرى جانە سپورت شەبەرلەرى كۋرسانت ر.يسمايلوۆ گىر تاسىن كوتەرۋدەن، كۋرسانت م.ناۋرىزبايەۆ سپورتتىق باعدارلاۋدان ەل چەمپيونى اتاعىن جەڭىپ الدى.   

كوڭىلدى تاپقىرلار كلۋبىنىڭ ساحناسىندا جارقىنداي جارقىلداپ، وتكىر ازىلدەرىمەن كورەمەندەردىڭ كوز ايىمىنا اينالىپ، جوعارعى ليگاعا دەيىن كوتەرىلگەن «بايلانىس جىگىتتەرىنىڭ» كۋرسانتتارى د.سۇلتانباي مەن  س.امانجولوۆ وقۋدا وزات، سپورتتا العىر، ونەردە كوماندانى جەڭىسكە جەتەلەدى. ال وقۋ ۇزدىگىنىڭ ءتوس بەلگىسىنە ۇمىتكەر كۋرسانت س.قۇربانبەك اقىندىق ونەردى بويىنا ءسىڭىرىپ، قويان-قولتىق توبەلەستەن رەسپۋبليكا بويىنشا جۇلدەگەر اتاندى.

ينستيتۋتتىڭ 5 وقۋ ۇزدىگى قازاقستان رەسپۋبليكاسىنىڭ قارۋلى كۇشتەرىنىڭ جوعارعى باس قولباسشىسى، ەلباسىنىڭ قولىنان التىن مەدال الادى دەپ جوسپارلانعان.

قورعانىس سالاسىنىڭ باسشىلارى بىلىكتى كومانديرلەردى دايىنداۋدا دۇرىس باعىتتى تاڭداي العان. ينستيتۋت باسشىلارى، وقىتۋشى-پروفەسسورلار قۇرامى جانە ءبىتىرۋشى تۇلەكتەردىڭ باتالون، روتا، ۆزۆود كومانديرلەرى وزدەرىنە قويىلعان جاۋاپكەرشىلىكتى تولىقتاي ورىنداپ كەلەدى. الداعى ۋاقىتتا دا بىلىكتى دە ءبىلىمدى، كاسىبي دەڭگەيى جوعارى، انتىنا ادال پاتريوت وفيسەرلەردىڭ سانىن ارتتىرۋدى ماقسات ەتىپ قويعان.