استانانىڭ ورتالىق ساياباعىنداعى اتتراكسيونداردىڭ بىرىنەن بويجەتكەن قۇلاپ كەتكەن.

1 ماۋسىمدا بولعان توتەنشە جاعداي جايلى قالانىڭ تۇرعىنى حابارلادى.

«ورتالىق ساياباقتاعى قىز بالا وتىرعان «روگاتكا» اتتراكسيونى ءۇزىلىپ كەتتى. الدىمەن تەمىرگە سوقتىعىسقان قىز اتتراكسيون جىبىنە بايلانىپ، اۋادا تۇرىپ قالدى. مۇنى كورگەن ادامداردىڭ ەسى شىقتى»، - دەپ جازدى Facebook پاراقشاسىنا ولەسيا كرەستيانينوۆا.

ونىڭ ايتۋىنشا، ساياباق يەلەرى قاۋىپسىزدىك تەحنيكاسىن ساقتامايدى. ءتىپتى اتتراكسيون استىندا توتەنشە جاعداي بارىسىندا ادامدار جەڭىل قۇلايتىن قابات جوق. تۇرعىندار بۇل وقيعاعا ەلوردا اكىمشىلىگىنىڭ نازارىن اۋدارىپ، قالا ىشىندەگى اتتراكسيونداردى تەكسەرۋىن تالاپ ەتتى.

ايتا كەتەيىك، بۇل وقيعا العاشقىسى ەمەس. مامىردىڭ باسىندا «جاننۇر»  ساۋدا ءۇيىنىڭ ماڭىنداعى باتۋت اۋدارىلىپ، بىرنەشە بالا زارداپ شەككەن. پوليسيا قىزمەتكەرلەرى وقيعاعا قاتىستى «قاۋىپسىزدىك تالاپتارىنا ساي كەلمەيتىن قىزمەتتەردى ۇسىنۋ» بابى بويىنشا ءىس تەرگەۋ جۇمىستارىن جۇرگىزدى.