ق ر باس سانيتاريالىق دارىگەرى جانداربەك بەكشين مەنينگيت ينفەكسياسى تۋرالى Whatsapp جەلىسىندە تارالىپ جاتقان اقپاراتقا بايلانىستى قازاقستاندىقتارعا ۆيدەو ۇندەۋ جولدادى، دەپ حابارلايدى Qamshy.kz اقپارات اگەنتتىگى. 

بەكشين Whatsapp جەلىسىندە بەلگىسىز ايەلدىڭ بالالارى بالاباقشاعا باراتىن اتا-انالاردى مەنينگيتكە قارسى انتيبيوتيكپەن ەمدەلۋگە شاقىرعان اۋديوجازبانىڭ تاراپ جاتقانىن ايتادى. 

دەنساۋلىق ساقتاۋ مينيسترلىگىنىڭ باس سانيتاريالىق دارىگەرىنىڭ مالىمدەۋىنشە، بۇل اقپارات راستالماعان.

"مەنينگيت جايلى جەلىدە تاراپ جاتقان قاۋەسەتكە سەنبەۋلەرىڭىزدى سۇرانامىز. تەك قانا مينيسترلىك تاراپىنان ايتىلعان اقپاراتقا سەنىڭىزدەر"، - دەيدى بەكشين.

جانداربەك بەكشيننىڭ ايتۋىنشا، جىل سايىن قازاقستاندا مەنينگيت دياگنوزىمەن 62-دەن 424-گە دەيىن ناۋقاس تىركەلەدى.  سونىمەن قاتار، بۇل دياگنوز ءتۇرى ادام تىعىز ورنالاسقان مەملەكەتتەردە دە ءورشىپ تۇر. مىسالى، 2018 جىلدىڭ ءبىرىنشى ماۋسىمىندا رەسەيدە - 257، ارمەنيادا - 31،  گرۋزيادا - 39 ادام ءولىمى تىركەلگەن. بۇل مەنينگيت دەرتىنىڭ الەمدە قاتتى ءورشىپ تۇرعانىن بىلدىرەدى. 

"ادەتتە ادام ولىمىنە الىپ كەلەتىن بارلىق سىرقات مەديسينالىق كومەككە كەش جۇگىنگەننەن بولادى. "ۋاقىت، ال سىرقات ودان دا جىلدام اسقىنىپ كەتۋى مۇمكىن"-، دەپ اتاپ ءوتتى دارىگەر.

جانداربەك بەكشين مەديسينالىق تۇرعىدان رۇقسات ەتىلگەن پروفيلاكتيكالىق شارالاردى اتاپ بەردى: مۇمكىندىگىنشە ادام كوپ جينالعان ورىندارعا، ويىن-ساۋىق، ساۋدا-ساتتىق كەشەندەرىنە بارماۋ، اۋاسى تار، جەلدەتىلمەيىن ورىندارداعى شارالارعا قاتىسپاۋ، مەترودا، قوعامدىق كولىكتە، ءبىر رەت پايدالانىلاتىن بەتپەردە تاعىپ ءجۇرۋ، جاتىن بولمەلەردى ءجيى جەلدەتۋ، ۇيدە دەزينفەكسيالاۋ قۇرالدارىمەن دىمقىل تازالىق جۇمىستارىن جۇرگىزۋ.

"تۇشكىرۋ جيىلەپ، جوتەل پايدا بولسا، تاماعىڭىز اۋىرسا، قىزۋىڭىز كوتەرىلسە، دەنەڭىزگە بورتپە شىقسا - دەرەۋ دارىگەردىڭ كومەگىنە جۇگىنىڭىزدەر. مۇمكىندىگىنشە سۋىقتاماۋعا تىرىسىپ،اشتىقتان، ۇيقىسىزدىقتان، سترەستتەن ساقتانىڭىزدار"، - دەپ اتاپ ءوتتى جانداربەك بەكشين.