بۇگىن «سەمەي ورمانى» مەملەكەتتىك تابيعي ورمان رەزەرۆاتىنىڭ ديرەكتورى مۇرات داۋلەتوۆ ب ا ق وكىلدەرىمەن باسپا ءسوز ءماسليحاتىن وتكىزىپ، كەشە بولعان ورتكە قاتىستى جۋرناليستەرگە تولىققاندى اقپارات بەردى.
بۇدان بولەك، قازىرگى تاڭدا قالامىزدا اۋقىمدى اۋماقتى الىپ جاتقان ورمان القابىن تاۋلىك بويى ونلاين رەجيمىندە باقىلايتىن، تمد-دا تەڭدەسى جوق ارنايى تەحنيكا قۇرىلعىسى تۋرالى ايتىپ بەردى. بۇل پيلوتتىق باعدارلاما بولىپ تابىلادى ەكەن. ءدال وسى قوندىرعىنىڭ ارقاسىندا قانداي دا ءبىر وتتىڭ ۇشقىنى كورىنگەن، تۇتىندەپ جاتقان جەردى بىردەن انىقتاپ بەرەدى. بىرنەشە جىل سەمەي اۋماعىندا ءىرى ءورتتىڭ الدىن الىپ وتىرۋعا وسى ءبىر نەمىس جەرىندە جاسالعان تەحنيكا كوپ پايداسىن تيگىزىپتى. الايدا، ءبىر وكىنىشتىسى بەسقاراعاي، بەگەن، بوكەباي سىندى ەلدى مەكەندەردە بۇل قۇرىلعى جوق بولعاندىقتان، ءورتتى باقىلاۋ ءبىراز قيىنعا سوعىپ وتىرعان كورىنەدى.
ايتا كەتۋ كەرەك، ماماندار كەشەگى ورىن العان ءورتتىڭ شىعۋىنا ادام كىنالى دەگەن بولجام جاساپ وتىر. سوندىقتان ورمان شارۋاشىلىعىنىڭ باسشىلىعى تۇرعىنداردان قاۋىپسىزدىك ەرەجەلەرىن ساقتاپ، وزدەرى دەمالىپ وتىرعان اۋماق ورتكە ورانىپ، جانىپ كەتپەۋ ءۇشىن مۇقياتتىلىقتى تالاپ ەتتى.
