وسكەمەندە وتباسى قۇندىلىقتارىن دارىپتەۋگە باعىتتالعان «مەرەيلى وتباسى-2018» ۇلتتىق بايقاۋىنىڭ وبلىستىق كەزەڭى مارەسىنە جەتتى.

وتباسى – ادام بالاسىنىڭ التىن دىڭگەگى. وتباسىنداعى تاربيەنىڭ ورنىن ەش نارسە تولتىرا المايدى. «ەل بولام دەسەڭ، بەسىگىڭدى تۇزە» دەگەن ناقىل ءسوز وتباسىنداعى تاربيەنىڭ ماڭىزدىلىعىن ايقىنداپ تۇر. وبلىس ورتالىعىندا وتكەن «مەرەيلi وتباسى –2018» بايقاۋىنىڭ اقتىق كەزەڭىنە ءوڭىرىمىزدىڭ قالا-اۋداندارىنان كەلگەن 19 وتباسى قاتىستى.

دراما تەاتردىڭ بايقاۋ وتەتىن زالىندا ينە شانشار جەر بولمادى. ويۋلى شاپان، كامزول سياقتى ۇلتتىق كيىمدەر كيگەن قاتىسۋشىلار بايقاۋعا بالالارىمەن، نەمەرە-شوبەرەلەرىمەن كەلگەن.

– وتباسى قاشاندا رۋحاني جانە مادەني قۇندىلىقتاردى، ۇلتتىق ءسالت-داستۇردى ساقتاۋشى، جالعاستىرۋشى، – دەدى سالتاناتتى شارانى اشقان وبلىستىق ىشكى ساياسات باسقارماسى باسشىسىنىڭ ورىنباسارى يرينا سميت. – وتباسىن قولداۋ، انا مەن بالا دەنساۋلىعىن قورعاۋ — ەلىمىزدەگى باسىم باعىتتاردىڭ ءبىرى. ەلباسىمىز نۇرسۇلتان نازاربايەۆ ۇنەمى ايتاتىنداي، وتانعا دەگەن سۇيىسپەنشىلىك وتباسىنان باستالادى. بالاعا پاتريوتتىق تاربيە بەرۋدە جانۇيانىڭ ماڭىزى زور. بەس الەۋمەتتىك باستاما دا وتباسىلار مەن ازاماتتاردىڭ جاعدايىن ارتتىرۋ ءۇشىن باسپانا الۋدىڭ جاڭا مۇمكىندىكتەرىن بەرۋگە، سالىق جۇكتەمەسىن ازايتۋعا باعىتتالعان. التىن القالى، كۇمىس القالى 25 مىڭنان استام باتىر انا – ەلىمىزدىڭ ماقتانىشى.

ساراپشىلاردىڭ شەشىمىمەن سەمەيلىك قانايەۆتار وتباسى بايقاۋ جەڭىمپازى اتاندى. ەكىنشى ورىندى – اياگوزدىك اناپيانوۆتار وتباسى، ءۇشىنشى ورىندى – زىرياندىق كەنشىلەر دميتريي مەن تاتيانا گريسليت وتباسى يەلەندى. بارلىق جەڭىمپازدارعا توڭازىتقىش، تەلەديدار، كىر جۋعىش ماشيناسى سياقتى باعاسى سىيلىقتار بەرىلدى. ال كوكپەكتىلىك سىدىقوۆتار «كوپ بالالى جاس وتباسى» اتالىمىنا يە بولدى.