كەشە كەشكىسىن نيەۆزوروۆتار وتباسى اتىنداعى بەينەلەۋ ونەرى مۇراجايىندا «مەنىڭ سۇيىكتى قالام» دەگەن اتاۋمەن «مۋزەي ءتۇنى-2018» ءوتتى. كەلەم دەۋشى ءاربىر قالا تۇرعىنىنا مۇراجاي ەسىگى اشىق بولدى. مۋزەيدىڭ ءار قابىرعاسىندا ءىلىنىپ تۇرعان مىڭجىلدىق تاريحى بار كارتينالار كوزدىڭ جاۋىن الىپ، ءدال وسى كۇنى وزگەشە كەيىپكە ەنىپ، جاڭاشا ءبىر لەپپەن جاندانا تۇسكەندەي كورىندى.

ۇيىمداستىرۋشىلار شاھار جۇرتشىلىعىنا ەرەكشە قىلىپ دايىنداعان باعدارلامالارىن ۇسىنىپ، ىزىلىك پەن مادەنيەتتىڭ كورىنىسى بولىپ تابىلاتىن ايىرىقشا تۋىندىلاردى تۇنگى 11-گە دەيىن تاماشالاۋعا رۇقسات ەتتى. كەش بارىسىندا ءتورت مۋزەيدىڭ قورىنان «ءالى دە سول ەرتىستە!» كوركەم كەسكىندەمە جانە گرافيكا كورمەسى، ولگا فەدەنيەۆانىڭ ەرەكشە قۋىرشاقتارى كوپشىلىكتىڭ نازارىنا ۇسىنىلدى. سونداي-اق، «مەنىڭ سۇيىكتى قالام» وتكرىتكا جاساۋ مەن ۆالەريي تيموفەيەۆتىڭ «مونوتيپيا تەحنيكاسىنداعى قالالىق پەيزاج» اتتى شەبەرلىك كلاسى وتكىزىلدى.

شاكارىم اتىنداعى مەملەكەتتىك ۋنيۆەرسيتەتىنىڭ 2 كۋرس ستۋدەنتى  ءۇمىت يتجانوۆا:

-18 مامىر- دۇنيەجۇزىلىك مۇراجايلار كۇنى. بۇل مەرەكە تەك مۇراجاي قىزمەتكەرلەرىنىڭ ەمەس، جالپى مادەني مۇرانى ساقتاۋعا بەيجاي قارامايتىن جانداردىڭ مەيرامى. شىنى كەرەك وسى شارا وتەدى دەگەن حابارلاندىرۋدى ەستىگەندە مىندەتتى تۇردە بارىپ، كورەمىن دەپ دوستارىما ۋادە ەتكەن بولاتىنمىن. بۇگىن مىنە كەلدىم ءبارى ويداعىداي بولىپ جاتىر، ماعان وتە قاتتى ۇنادى. مۇنداعى ءاربىر كارتينا ءتىرى قۇبىلىستار ىسپەتتى. ال ەرەكشەلىككە تولى وزگەشە كوزىلدىرىكتەر، باس كيىمدەر ءتىپتى كوڭىلىمدى جادىراتىپ جىبەردى. جالپى العاندا، جاقسى كورەمىن وسىلاي دەمالعاندى. ۇنايدى جانە باسقالارعا دا كەڭەس بەرەمىن.

ەسكى اڭىزدارعا سەنسەك، مۇراجايدا تۇنگى ۋاقىتتا عاجايىپ قۇبىلىستار بولادى دەيدى. ول راسىمەن دە بولدى دەپ ايتساق تا ارتىق ايتپاعانىمىز. ولاي دەيتىن سەبەبىمىز ۆسيەۆولود دەميدوۆتىڭ «جاڭا كوزقاراس» اتتى وپتيكالىق اسپاپتار كورمەسى تالاي ادامداردى تاڭقالدىردى. بۇل جەردە كەز-كەلگەن ادام ۆسيەۆولود مىرزانىڭ ءوزى جاساعان ءتۇرلى اسىل تاستارمەن بەزەندىرىلگەن ەكسكليۋزيۆتى قالپاقتاردى، ءارتۇرلى پىشىندەگى كوزىلدىرىكتەردى كوزبەن كورىپ قانا قويماي، كيىپ كورۋ مۇمكىندىگىنە دە يە بولدى.