وبلىس ورتالىعىندا جيتس دەرتىنەن قايتىس بولعانداردى ەسكە الۋ اكسياسىنا وسى ءقاۋىپتى دەرتتەن كوز جۇمعان تۋىستارى مەن دوستارىن ەسكە الۋشىلار مەن قالا تۇرعىندارى جينالدى. شارا اياسىندا قايىرىمدىلىق مارافونى ءوتتى. جارىسقا بەس جاستاعى بالاقايدان باستاپ، 58 جاسقا دەيىنگى ازامات قاتىستى.

-وڭىردە ايتۆ جۇقپاسىن جۇقتىرعان 30 بالا ەسەپتە تۇر. قايىرىمدىلىق جارىسىنان تۇسكەن 14 مىڭنان استام قارجى وسى بالعىندارعا دارۋمەندەر الۋعا جۇمسالادى. قاتەرلى جۇقپامەن كۇرەس بارىسىندا بىزگە «قۋات»، «انسۆەر» سياقتى بەلسەندى ۇكىمەتتىك ەمەس ۇيىمدار ۇنەمى قولداۋ كورسەتىپ كەلەدى، — دەپ اتاپ ءوتتى وبلىستىق جيتس الدىن الۋ جانە كۇرەس ورتالىعىنىع باس دارىگەرى مارينا جەگولكو.

اكسيا كەزىندە جيتس دەرتىنەن قايتىس بولعانداردىڭ ەسىمدەرى جازىلعان كۆيلت ءىلىندى.

-جىل سايىن بۇل كۇندى الەمدە 70-تەن استام ەلدە اتاپ وتەدى. بۇل تەك قاتەرلى جۇقپا ارامىزدان الىپ كەتكەندەرى ەسكە الۋ عانا ەمەس، قوعامنىڭ نازارىن وسى دەرتكە شالدىققانداردىڭ پروبلەمالارىنا اۋدارۋ. قوعامدا ءالى كۇنگە ايتۆ جۇقپاسىن جۇقتىرعانداردى كەمسىتۋ، قۇقىقتارىن شەكتەۋ كەزدەسەدى. ءبىزدىڭ قوعامدىق بىرلەستىك وسىنداي دياگنوزى بار ادامدارعا قولداۋ كورسەتەدى. ءبىزدىڭ ۇيىمدا 2017 جىلدان بەرى سىلەكەي ارقىلى جۇقپانى انىقتاۋعا جەدەل تەست وتكىزىلەدى. تەستىڭ ناتيجەسىنىڭ دالدىگى 99 پايىز دەسەك تە، دياگنوز ودان كەيىن مىندەتتى تۇردە زەرتحانالىق تالداۋلار جۇرگىزىلىپ بارىپ، قويىلادى، — دەيدى «قۋات» ۇكىتەتتىك ەمەس ۇيىمىنىڭ جەتەكشىسى اندرەي چەرنىشوۆ.

شارا كەزىندە نيەت بىلدىرۋشىلەر ەكسپرەسس-تەستىڭ كومەگىمەن ءوز ستاتۋستارىن انىقتاۋ مۇمكىندىگىنە يە بولدى. سونىمەن قاتار جينالعاندار قاتەرلى جۇقپا تۋرالى ۆيكتورينالىق سۇراقتارعا جاۋاپ بەردى. جەڭىمپازداردىڭ بارلىعىنا ەستەلىك سىيلىقتار تاپسىرىلدى.

اكسيانىڭ سوڭىندا قاتىسۋشىلار وسى دەرتتەن كوز جۇمعانداردى ەسكە الۋ ماقساتىندا مايشام جاعىپ، اسپانعا شارلار ۇشىردى.