بيىل  ماقتارال  اۋدانىندا  20 گەكتارعا  جۋىق  جەرگە  تۇقىمباق سالىناتىن بولادى. بۇل باستاما وزبەكستان  رەسپۋبليكاسىمەن بىرلەسكەن تۇردە  جۇزەگە  اسىرىلماق. وسى ماقساتتا ماقتارال اۋدانىنان ارنايى  جەر تەلىمى ءبولىنىپ، ءمىرزاشول ءوڭىرىنىڭ كليماتىنا قولايلى، جەرسىنەتىن دال-داراقتاردىڭ كوشەتتەرى وسىرىلمەك. سونداي-اق، اۋدانداعى كانال جانە ارىق-اتىزداردىڭ جاعالاۋلارىنا تەگىس باتپاقتى ساۋىر (بالوتنىي كيپاريس) اعاشى وتىرعىزىلاتىن بولادى. بۇل تۋرالى اۋدان اكىمدىگىندە وتكەن جيىندا  ءوڭىر باسشىسى جامانتاي بەيسەنبايەۆ ءمالىم ەتتى.

ازىرگە اتالعان جوبانى جۇزەگە اسىرۋ ماقساتىندا كەلىسسوزدەر جۇرگىزىلۋدە. وزبەكستان جاعى بۇل ۇسىنىستى تەز ارادا ىسكە اسىرىپ،  بىرلەسكەن تۇقىمباق جۇمىسىن جانداندىرۋعا بارىنشا كۇش سالامىز دەپ وتىر.  اۋدان اكىمى جاۋاپتى سالا باسشىلارىنا جاقىن ارادا ارنايى جەر تەلىمىن ءبولىپ، اكت ازىرلەپ، زەرتتەۋ-زەردەلەۋ جۇمىستارىن باستاۋدى تاپسىردى.

 «ەگەر اتالعان جوبامىز ىسكە اسسا، اۋدان كليماتىنا قولايلى تال-داراقتاردى ءوسىرۋ قولعا الىناتىن بولادى. بۇل بىرىنشىدەن، ءمىرزاشول توپىراعىنا جەرسىنبەيتىن، ءوسۋ كورسەتكىشى تومەن، ساپاسىز كوشەتتەرگە جۇمسالاتىن قىرۋار قارجىنى ۇنەمدەۋگە سەپتىگىن تيگىزەدى. ەكىنشىدەن، اۋداندى اباتتاندىرۋ، كوگالداندىرۋ ماقساتىنداعى وبلىس اكىمىنىڭ «شاتقال» باعدارلاماسىن ويداعىداي جۇزەگە اسىرۋعا مۇمكىندىك بەرەدى»، - دەدى جامانتاي قاناي ۇلى.

ءمىرزاشول ءوڭىرىنىڭ  كليماتى  كونتينەنتتىك سانالادى. مۇندا قىس وتە  قىسقا، ءبىرشاما جۇمساق، ال  جازى ىستىق، اڭىزاقتى بولىپ كەلەدى. وسىنى ەسكەرگەن اۋدان باسشىسى الداعى ۋاقىتتا وڭىردەگى باتپاقتى جەرلەرگە باتپاقتى ساۋىر (بالوتنىي كيپاريس) اعاشىن وتىرعىزۋ قاجەتتىگىنە توقتالدى. اتالعان اعاش وتتەگى جوق، باتپاقتا، سازدى جەرلەردە جىلىنا 2،5 مەترگە دەيىن وسەدى. قابىعى جۇقا بولادى. اعاش دىڭىنە جابىسىپ وسكەن سۇيەسىننىڭ (ورحيديا) اۋا تامىرلارى نەگىزىنەن اعاش قابىعىنان سىرعىپ اققان سۋ مەن جاڭبىر سۋىن سىڭىرەدى.