ق ر دەنساۋلىق ساقتاۋ ءمينيسترى ەلجان ءبىرتانوۆ  مەنينگوكوكك ينفەكسياسىنىڭ تاراۋىنا بايلانىستى الماتىدا جۋرناليستەرمەن كەزدەستى. بۇل جايىندا Qamshy.kz اقپارات اگەنتتىگى حابارلايدى. 

كونفەرەنسياعا ق ر دەنساۋلىق ساقتاۋ ءمينيسترى ە. ءبىرتانوۆ، الماتى وبلىسى اكىمىنىڭ ورىنباستارى ج. ومار، الماتى قالاسى اكىمىنىڭ ورىنباسارى م. دارىبايەۆ قاتىستى. 

— وسى ۋاقىتقا مەنينگيتكە بايلانىستى 59 ادام تىركەلدى. الماتىدا سوڭعى ءۇش كۇندە مەنينگيتكە بايلانىستى اۋرۋحاناعا تۇسكەندەر جوق. پرەمەر-مينيستردىڭ بۇيرىعىمەن الماتى قالاسىنىڭ اۋرۋحانالارىن تەكسەرۋگە كەلدىك. كەشەلى بەرى تالعارداعى اۋرۋحاناعا، ەسىكتەگى اۋرۋحاناعا، قالالىق بالالار ينفەكسيالىق اۋرۋحاناسىنا، جەتىنشى قالالىق اۋرۋحاناعا بارىپ، جاعدايمەن تانىستىق. بۇگىندە مەنينگيتكە شالدىققاندارمەن قاتىناستا بولعانداردىڭ سانى ءتورت مىڭعا جەتتى. ولارمەن دارىگەرلەر تىكەلەي جۇمىس ىستەپ جاتىر. مەديسينالىق كومەككە كەلەر بولساق، وبلىستاعى تۇرعىندارعا كورسەتىلەتىن كومەكتىڭ تومەن ەكەنى جايلى ارىزدار كەلىپ ءتۇستى. دسم ەنگىزگەن ەرەجەلەردىڭ بۇزىلۋى دا بولعان. ەرەجەگە سايكەس، ناۋقاستى ءبىر اۋرۋحانادان ەكىنشى اۋرۋحاناعا جىبەرۋگە  رۇقسات جوق. تالعاردان قاسكەلەڭگە جىبەرىلگەن ناۋقاس قايتىس بولعان. سوعان بايلانىستى تەكسەرۋلەر جۇرگىزىلدى، - دەدى مينيستر.

ءبىرتانوۆتىڭ ايتۋىنشا، تۇرعىنداردىڭ تىركەلگەن جەرىنە قاراماستان، مەديسينالىق كومەك ناۋقاس جەتكىزىلگەن اۋرۋحانادا كورسەتىلۋ كەرەك. الماتى قالالىق دەنساۋلىق ساقتاۋ باسقارماسىمەن وسى ماسەلە جۇماعا دەيىن شەشىلەدى.

سونىمەن قاتار ق ر دەنساۋلىق ساقتاۋ ءمينيسترى ەلجان ءبىرتانوۆ مەنينگوكوكك ينفەكسياسىنا قارسى ۆاكسينا باعاسىن ارزانداتۋ بويىنشا جۇمىستار جۇرگىزىلەتىنىن مالىمدەدى.

ايتا كەتەيىك، كەشە تالدىقورعاندا 17 جاستاعى ستۋدەنت جىگىت مەنينگيتەن كوز جۇمدى. 

كەشە استانادا مەنينگوكوكك ينفەكسياسىن جۇقتىردى دەگەن كۇدىكپەن جانساقتاۋ بولىمىنە ەكى جاستاعى بالا جەتكىزىلدى.

قازاقستان رەسپۋبليكاسى دەنساۋلىق ساقتاۋ مينيسترلىگى قازاقستان تۇرعىندارىنا كەڭەس بەردى. 

ايگەرىم تاۋباي