وتىرار اۋداندىق  مادەنيەت سارايىندا وتكەن شارادا "قازاقستانداعى 100 جاڭا ەسىم" جوباسىنا ەنگەن وڭتۇستىكقازاقستاندىق ەل ماقتانىشتارى ارنايى قىزىل كىلەممەن ءجۇرىپ ءوتىپ،  قىلقالام شەبەرى ءا.مالىكتىڭ سۋرەت كورمەسىن تاماشالادى.

وتىرار اۋدانى اكىمدىگىنىڭ ۇيىمداستىرعان  تاريحي جيىنعا 600-گە جۋىق اۋدان جاستارى مەن تۇرعىندار قاتىسىپ، جىلى جۇزدەسۋگە ايرىقشا ىقىلاستارىن ءبىلدىردى.

"رۋحاني جاڭعىرۋ-تاريحىمىزدى تەرەڭنەن تولعاپ، بولاشاققا جارقىن ءىز سالاتىن ايرىقشا باعدارلاما. ەل ەرتەڭىنە نىق قادام، بىرەگەي ماقساتقا باعىتتايتىن تۇعىرى بيىك باستاما كوپتەگەن ىلكىمدى ىستەرگە جول اشتى. سونىڭ ءبىرى، "قازاقستانداعى 100 جاڭا ەسىم" جوباسى بولسا، ەل تاڭداۋىمەن قۇرمەت بيىگىنە كوتەرىلگەن حالىق ارداقتىلارىنىڭ ماقساتى مەن ەڭبەگى، جەتكەن جەتىستىگى مەن ادالدىق، ابىروي بيىگىندەگى قادىر-قاسيەتى ءاربىر جاستىڭ ساناسىندا مىقتاپ ءتۇيىلۋى ءتيىس. ولاردى قۇرمەت تۇتا وتىرىپ، ىزگى جولىنان تالىم-تاربيە الا ءبىلۋى كەرەك"-دەپ، تاريحتىڭ ىزگى بەتتەرىندە ەسىمدەرى جازىلعان ەل ارداقتىلارىن قۇتتىقتاعان وتىرار اۋدانىنىڭ اكىمى ايتاحانوۆ ەرلان قۋانىش ۇلى اۋدان حالقى اتىنان ارنايى سىي-سياپاتتار تابىس ەتتى.

ەلباسى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا اتاپ كورسەتىلگەن، جاستاردىڭ ۇلگى الۋىنا، زاماناۋي قازاقستاننىڭ كەلبەتىن تانىتۋعا مۇمكىندىك بەرەتىن «قازاقستانداعى 100 جاڭا ەسىم» جوباسىنا  وڭتۇستىك قازاقستان وبلىسىنان ەنگەن ازاماتتار ىشىندە وتىرار ەلىن سپورت ارەناسىندا رەسپۋبليكا مەن قاتار  الىس-جاقىن شەت ەلدەرگە تانىتىپ جۇرگەن، قازىرگى تاڭدا سامبودان ازيا جانە ەۋروپا چەمپيونى قۇرالباي ورىنباسار مەن ەلىمىزگە اتى ءماشھۇر ايتىسكەر اقىن بەكارىس شويبەكوۆ  تە بار ەكەندىگى بەلگىلى.

شاراعا اتالعان ازاماتتارمەن قاتار، قازاقتىڭ ۇلتتىق زياتكەرلىك سپورتىنىڭ جارىق جۇلدىزى، توعىزقۇمالاقتان الەمنىڭ 7 دۇركىن چەمپيونى اسەل دالييەۆا، جەكە كاسىپكەر «قايىپ اتا» ج ش س ديرەكتورى ەرتايەۆ سىرىم ماحامبەت ۇلى قاتىستى.
كەزدەسۋ كەشىنىڭ ماقساتى -تاۋەلسىزدىك داۋىرىندە ەلىمىزدىڭ كوركەيۋىنە ۇلەس قوسقان، ۇلتىمىزدىڭ التىن قورىنا ەنۋگە لايىقتى وڭتۇستىكقازاقستاندىقتاردى كوپشىلىككە تانىتۋ بولىپ تابىلادى.

اۋداننىڭ مارتەبەلى مەيماندارىنا بەلگىلى ايتىسكەر اقىن داۋرەن اقساقالوۆ ارناۋ ايتىپ، ساليقالى ەڭبەك جولدارىن سۇلۋ سوزبەن جەتكىزسە، اۋدان ونەرپازدارى ءداستۇرلى ءان، كۇمبىرلەگەن كۇي توگىلتىپ ءىلتيپاتتارىن ءبىلدىردى.

شاراعا قاتىسۋشى تاريح تۇلعالارى ءومىرى مەن ەڭبەك جولدارى جايىندا اڭگىمەلەپ، ساۋالدارعا جاۋاپ بەردى. ءوز پىكىرى مەن سۇراعىن جولداۋشىلار اراسىندا اۋدان اكىمى دە بار. وتىراردان شىققان جاس مامانداردى كاسىپكەرلىككە باۋلۋ مەن ۇستازدىق ەتۋ، اۋداندا جاڭا كاسىپ ورنىن اشۋ،  سپورت سالاسىن دامىتۋعا قولداۋ ءبىلدىرۋ سىندى ءبىرقاتار ساۋالدارىن قوناقتارعا حالىق ورتاسىندا تۇرىپ توتەسىنەن قويعان اۋدان باسشىسى ەرلان قۋانىش ۇلىنىڭ بۇل قادامى 100 جاڭا ەسىم يەلەرىن قايران قالدىردى. قاراپايىم اۋدان باسشىسىنىڭ كيەلى ايماقتى دامىتۋعا باعىتتالعان ماقساتتارى مەن ەڭبەگىنە ايرىقشا العىسىن بىلدىرگەن جەكە كاسىپكەر «قايىپ اتا» ج ش س ديرەكتورى سىرىم ەرتايەۆ جاس مامانداردى مال شارۋاشىلىعىنا باۋلي وتىرىپ، وتىراردان جاڭا جۇمىس ورنىن اشۋعا كەلىسىمىن بەرسە، وزگە دە قوناقتار قولداۋ بىلدىرۋگە نيەتتى ەكەندىكتەرىن جەتكىزدى.

جيىن قايتا جاڭعىرعان «وتىرار» مەملەكەتتىك ارحەولوگيالىق قورىق-مۋزەيى مەن  "كەيكى باتىر" ءفيلمىنىڭ ءتۇسىرىلىم الاڭىن  تانىستىرۋعا ۇلاسىپ، اۋىزاشار بەرىلدى.