الاكول دەمالىس ايماعىنىڭ ينفراقۇرىلىمىن دامىتۋعا ءۇش جىلدا 4،5 ميلليارد تەڭگە ءبولىندى. بۇل تۋرالى كول جاعالاۋىنداعى دەمالىس بازالارىنىڭ جازعى ماۋسىمعا دايىندىعىن تەكسەرگەن وبلىس اكىمى دانيال احمەتوۆ مالىمدەدى.

ساپار بارىسىندا ايماق باسشىسى جەرگىلىكتى اربات پەن كول جاعالاۋىنداعى قۇرىلىس جۇمىستارىمەن تانىستى. اتاپ ايتقاندا، ماۋسىمارالىق ءۇزىلىس كەزىندە مۇندا جاڭا ورىندىقتار مەن گۇلزارلار، الىپ الاكول جازۋى سياقتى دۇنيەلەر پايدا بولعان. جەرگە تراتۋارلىق پليتالار توسەلگەن. ءقازىر ارباتتىڭ ورتالىق بولىگىندە سۋبۇرقاق قۇرىلىسى جۇرگىزىلۋدە. ءبىر جىلدىڭ ىشىندە اجەپتاۋىر جاڭالانعان كول جاعالاۋىنداعى قۇرىلىس جۇمىستارىنىڭ بارىسىمەن تانىسقان وبلىس اكىمى اتقارىلعان شارۋاعا كوڭىلى تولاتىنىن جەتكىزدى. دەگەنمەن ءبىراز سىن دا ايتىلدى.

– كەيبىر دەمالىس بازالارى عيماراتتارىنىڭ سىرتقى كەلبەتىن وزگەرتۋ كەرەك. بۇل جەردەگى بازالار مەن مەيرامحانالاردىڭ بارلىعى ساۋلەتتىك ءستيلى جاعىنان ۇقساس بولۋى ءتيىس. سونىمەن قاتار ءورت قاۋىپسىزدىگى تالاپتارى قاتاڭ ساقتالۋى شارت، – دەگەن وبلىس اكىمى بيىل الاكول جاعالاۋىنىڭ باس جوسپارى ازىرلەنەتىنىن دە جەتكىزدى.