بۇل تۋرالى مەديسينا ۋنيۆەرسيتەتىنىڭ باسپا ءسوز قىزمەتى مالىمدەدى. ەلىمىزدەگى ۇزدىك وقۋ ورىنداردىڭ ءتىزىمىن اككرەديتتەۋ جانە رەيتينگ تاۋەلسىز اگەنتتىگى انىقتاعان.

تىزىمنەن ءال-فارابي اتىنداعى قازاق ۇلتتىق ۋنيۆەرسيتەتى، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى، م. اۋەزوۆ اتىنداعى وقو-نىڭ مەملەكەتتىك ۋنيۆەرسيتەتى، س. سەيفۋللين اتىنداعى قازاق اگروتەحنيكالىق ۋنيۆەرسيتەتى، اكادەميك ە. بۋكەتوۆ اتىنداعى قاراعاندى مەملەكەتتىك ۋنيۆەرسيتەتى، سونداي-اق، قاراعاندى مەملەكەتتىك تەحنيكالىق ۋنيۆەرسيتەتى ورىن الىپتى.

تاۋەلسىز اگەنتتىك جۇرگىزگەن ۇلتتىق رەيتينگ قازاقستاندىق وقۋ ورىندارعا وزدەرىنىڭ بەدەلىن، ءبىلىم بەرۋدەگى باسەكەلەستىك دەڭگەيىن باعالاۋعا، ساپالى جۇمىس قىزمەتىن ارتتىرۋعا جانە دە، ەڭ باستىسى، بۇل – ءبىلىم الۋشىلاردىڭ سانىن كوبەيتىپ، جۇمىس بەرۋشىلەردى تارتۋعا مۇمكىندىك بەرەتىن تىڭ تاسىلدەردىڭ ءبىرى. 2014 جىلدان بەرى قولعا الىنعان اتالمىش جوبا رەسپۋبليكاداعى الدىڭعى قاتارلى ءبىلىم وردالارىن ىرىكتەۋگە سەپتەگىن تيگىزۋدە.

ال ۇزدىكتەردى انىقتاۋ جۇيەسى كەلەسىدەي كريتەريلەر بويىنشا ىسكە اسادى ەكەن. ولار: وقۋ ورىنداعى تالانتتى ستۋدەنتتەر، وقىتۋشىلار جانە زەرتتەۋشى-عالىمداردىڭ شوعىرلانۋى. پروفەسسورلىق-وقۋتىشىلىق قۇرام مەن ستۋدەنتتەردىڭ اكادەميالىق ۇتقىرلىعى، ءبىتىرۋشى تۇلەكتەردىڭ جۇمىسپەن قامتىلۋداعى ساپا دەڭگەيى، ءبىلىم ۇياسى جانە جۇمىس بەرۋشىلەردىڭ ءوزارا ءتيىمدى بايلانىسى. سول سياقتى وقىتۋشىلار، دوكتورانتتار ءارى ماگيسترانتتاردىڭ عىلىمي ماقالالارىنىڭ باسەكەگە قابىلەتتىلىگى ەسەپكە الىناتىن كورىنەدى. بيىلعى جىلى ۇلتتىق رەيتينگكە ەلدەگى 75 ءبىلىم ۇيىمى ءوتىنىش ءبىلدىرىپتى. الايدا ولاردىڭ 17ء-سى بايقاۋدان شەتتەتىلگەن. سەبەبى ءوتىنىش تولتىرۋدا ورەسكەل قاتەلىكتەر جىبەرىلگەن-دى. باس تىزىمگە 58 جوعارى وقۋ ورىن ەنىپ، ونىڭ ىشىندە 6-ۋى ۇلتتىق، 21 مەملەكەتتىك، 7 اكسيونەرلى جانە 24 مەكەمە جەكەمەنشىك ءبىلىم ۇيىمى بولىپ سانالادى. وسىلايشا بولاشاق اق حالاتتىلاردى دايىندايتىن سەمەيدەگى مەديسينا ۋنيۆەرسيتەتى ءوز ابىرويىن لايىقتى قورعاپ وتىر.