سوڭعى جىلدارى وبلىستا ءبىلىم الىپ جاتقان ستۋدەنتتەردىڭ سانى كۇرت ارتتى. سوعان بايلانىستى جاتاقحانا ماسەلەسى تۋىندادى. سول سەبەپتەن وڭىردەگى جوعارعى وقۋ ورىندارىنىڭ باسشىلارى ەلىمىزدىڭ ءبىلىم جانە عىلىم مينيسترلىگىمەن بىرىلەسىپ، ستۋدەنتتەردىڭ تۇرعىن ءۇي ماسەلەسىن شەشۋدى جوسپارلاپ وتىر.

الداعى جىلدارى وبلىستا ستۋدەنتتەرگە ارنالعان 11 جاتاقحانا سالىنادى. بۇگىندە مەملەكەتتىك جانە جەكەمەنشىك ارىپتەستىك نەگىزىندە بوي كوتەرەتىن نىسانداردىڭ جوبا-جوسپارى جاسالۋدا. رەسمي دەرەكتەرگە سۇيەنسەك، وسكەمەندەگى د.سەرىكبايەۆ اتىنداعى شقمتۋ مەن س.امانجولوۆ اتىنداعى شقمۋ-دا توعىز مىڭعا جۋىق ستۋدەنت ءبىلىم الۋدا. ال ولاردىڭ تەڭ جارتىسى عانا جاتاقحانادا تۇرادى.

– ستۋدەنتتەر ۇيىندە بوس ورىن بولماعاندىقتان، پاتەر جالداپ تۇرىپ جاتىرمىن. ايىنا 40 مىڭ تەڭگە تولەيمىن. نەگىزى جاتاقحانا ەڭ الدىمەن كوپبالالى وتباسىنىڭ بالالارى مەن مەملەكەتتىك گرانتپەن وقۋعا تۇسكەندەرگە بەرىلەدى، — دەيدى ستۋدەنت توعجان مەيرامحانوۆا.
بۇگىندە وبلىستا «سەرپىن» باعدارلاماسى بويىنشا وڭتۇستىك وڭىرلەردەن وقۋعا كەلگەن ءبىر جارىم مىڭ ستۋدەنت ءبىلىم الۋدا. الداعى جىلدارى ولاردىڭ قاتارى تاعى دا كوبەيمەك.