جىلدا سەمەي شاھارىندا ەڭ سۇلۋ، ەڭ اقىلدى ارۋلاردى انىقتاۋ ماقساتىندا كوپتەگەن سۇلۋلىق بايقاۋلارى وتكىزىلەدى. بيىلدا بۇل ءۇردىس جالعاسىن تاۋىپ، شاھارىمىزداعى قالالىق مادەنيەت سارايىندا «قازاقستان ستۋدەنتتەر اليانسى» رسق-نىڭ ۇيىمداستىرۋىمەن كوپشىلىك اسىعا كۇتكەن «سەمەي ارۋى -2018» بايقاۋى ءوتتى. سىرتقى سۇلۋلىق پەن ىشكى ادەمىلىكتىڭ ۇيلەسىمدىلىگى قاتار سىنالاتىن بۇل دوداعا قالامىزداعى جوعارعى جانە ورتا ارناۋلى ءبىلىم مەكەمەلەرىنەن  بەس بويجەتكەن قاتىسىپ، بار ونەرلەرىن ورتاعا سالدى.

سايىس جالپى ءتورت كەزەڭدى قامتىدى. ءبىرىنشى اينالىمدا وزدەرىن ۆيدەو نەمەسە شاعىن ساحنالانعان كورىنىس ارقىلى تانىستىرسا، ەكىنشى بولىمدە كوپتەن بەرى دايىنداپ جۇرگەن ەرەكشە ونەرلەرىن ءدۇيىم جۇرتقا پاش ەتتى. ودان ءارى ءار ۇمىتكەرگە ەلىمىزدىڭ تاريحى مەن ادەبيەتىنە قاتىستى جانە قازاق حالقىنىڭ ءسالت-داستۇرى، ادەت-عۇرىپىنا بايلانىستى ءبىر سۇراقتان قويىلدى. ال بارلىعىن قورىتىندىلايتىن ادەمى كەشتىڭ ەڭ سوڭعى شەشۋشى كەزەڭىندە ۇلتتىق ناقىشتاعى كيىمدەرىمىزدى كيىپ، ءسان ۇلگىسىن كورسەتتى.

«بۇگىنگىنىڭ ايگەرىمى ءبىز بولامىز» دەپ ولەڭ شۋماقتارىمەن ءوزىن تانىستىرعان ايگەرىم تولەۋعالييەۆانىڭ تىڭعىلىقتى دايىندىقپەن كەلگەنى بىردەن كورىنىپ-اق تۇردى.

دەفيلە بولىمىندە كوزدىڭ جاۋىن العان كەشكى كويلەكتەر ساحنانىڭ كوركىن ودان ارى اجارلاندىرا ءتۇستى.

سونداي-اق، جاقيا ءشايجۇنىسوۆ اتىنداعى ەلەكتروندى كوللەدجدىڭ نامىسىن قورعاعان ىرىسبالا مۇراتوۆا بولسا، «تانگو» ءبيىن بيلەپ قانا قويماي، كىشىگىرىم شوۋ جاساعانى جينالعان قاۋىمدى تاڭقالدىردى.

سونىمەن بايقاۋدىڭ قورىتىندىسى بويىنشا، بارلىق قىزداردان وق بويى وزعان م.و. اۋەزوۆ اتىنداعى پەداگوگيكالىق كوللەدجىنىڭ اتىنان شىققان ايگەرىم بولات قىزى جەڭىس تۇعىرىنىڭ ەڭ بيىك ساتىسىنا كوتەرىلىپ، «سەمەي ارۋى-2018» دەگەن اتاققا لايىق دەپ تانىلدى.