قالامىزداعى سەمەي مەملەكەتتىك مەديسينا ۋنيۆەرسيتەتىندە «سالاۋات» دەبات كلۋبىنىڭ تىكەلەي باستاماسىمەن «رۋحاني جاڭعىرۋ» باعدارلاماسى اياسىندا استانا قالاسىنىڭ 20 جىلدىعىنا وراي «CINEMA CUP II» اشىق ايماقتىق پىكىر-سايىس ءتۋرنيرى ءوتتى. تارتىسقا تولى دوداعا جالپى سانى 20-عا جۋىق فراكسيا قاتىسىپ، ءوز ارالارىندا كىل مىقتىلاردى انىقتادى.

ءتۋرنيردىڭ ىرىكتەۋ راۋندتارى بريتاندىق پارلامەنتتىك فورماتىندا (بپف) وتسە، فينالدىق ويىندار امەريكالىق پارلامەنتتىك فورماتىندا (اپف) ويناتىلدى. بۇل پىكىر-سايىس دوداسىنىڭ وزگە تۋرنيرلەردەن ەرەكشەلىگى — تاقىرىپتاردىڭ بارلىعى كينوداعى قىزىقتى وقيعالار جەلىسىنەن قۇرالعان.

جارىستى قىزىقتى وتكىزۋ ماقساتىندا ۇيىمداستىرۋشىلار 1 اپتا بۇرىن «ۆكونتاكتە» الەۋمەتتىك جەلىسىندە «CINEMA CUP II» دەگەن اتاۋمەن ارنايى توپ اشىپ، تۋرنيردە ويناتىلاتىن 9 ءفيلمنىڭ تولىق نۇسقاسىن جۇكتەپ، قىسقاشا اقپاراتتارمەن ءبولىسىپ وتىرعان بولاتىن.

ءاربىر راۋندتا ءسوزدى بىردە سالقىنداتىپ، بىردە وتتاي جالىنداتىپ، تاپقىرلىقپەن ءسوز سۋرەتىن سالعان پىكىرسايىسشىلار كوپتەگەن قىزىقتى قارارلاردى ورتاعا سالىپ، ءفيلمنىڭ باستى كەيىپكەرلەرلەرىنىڭ وبرازىنا تولىققاندى كىرە الدى.

سونىمەن كوپتەن كۇتكەن جەڭىمپازدار تىزىمىنە كوز جۇگىرتەتىن بولساق، «سالاۋات» پىكىر-سايىس ورداسىنىڭ نامىسىن قورعاعان «روشارح» فراكسياسى : نۇرباقىت يساحان مەن نۇراي ماساليم جەڭىس تۇعىرىنىڭ ەڭ بيىك ساتىسىنا كوتەرىلىپ، كۋبوكتى قانجىعالارىنا بايلادى. ال، ويناۋ ستيلدەرىمەن ەرەكشەلەنگەن قالامىزداعى «كونگرەسس» ينتەللەكتۋالدى دەبات كلۋبىنىڭ «وگست ليۋمەر» فراكسياسى مەن وسى كلۋبتىڭ جاس بۋىندارى ميرات رۇستەم ۇلى مەن نارگيز ايمۋحامەتوۆا جۇلدەگەرلەر قاتارىنان كورىندى. سونداي-اق، ءتورت راۋندتىڭ كورسەتكىشى بويىنشا ەڭ جوعارى ۇپاي جيناعان 8 سپيكەر اراسىندا لينكولن-دۋگلاس (لد) فورماتىندا ۇزدىك ونەر كورسەتكەن دانيار بەيسەمبەكوۆ بولسا «ەڭ ۇزدىك سپيكەر» نوميناسياسىن جەڭىپ الدى.