وبلىستىق «ALTAI» تەلەارناسىنىڭ 60-جىلدىعىن اتاپ ءوتۋ قارساڭىندا وڭىردەگى بۇقارالىق اقپارات قۇرالدارى اراسىندا پەينتبول، ساداق اتۋ جانە سترايكبول اۆتوماتىنان نىساناعا اتۋ بويىنشا دوستىق تۋرنيرى ءوتتى.

بيىل ايتۋلى شارانى اتاپ وتۋدە التى كوماندا جارىس جولىنا شىقتى. ولار:«شىعىس اقپارات» ج ش س، س.امانجولوۆ اتىنداعى شقمۋ، «ALTAI» ارناسىنان ەكى كوماندا، «ۆەستنيك كازسينكا» گازەتى، سونداي-اق باسپا ءسوز حاتشىلارىنان قۇرالعان كوماندا.

ايتا كەتۋ كەرەك، ««ALTAI»» تەلەارناسى سپورتتىق سايىستى وبلىستىق دەنە شىنىقتىرۋ جانە سپورت باسقارماسىمەن بىرلەسە وتىرىپ ۇيىمداستىردى. جارىس تورەشىلەرى ەڭ الدىمەن جەرەبە تارتىپ، قارسىلاستاردى انىقتادى. قاتىسۋشىلار جوعارىدا اتاپ وتكەندەي، العاش بولىپ كەدەرگىلەردەن جۇگىرىپ ءوتىپ، سترايكبول اۆتوماتىنان نىساناعا تيگىزدى. ودان كەيىن پەينتبولدان باقتارىن سىناپ، ارتىنشا ساداق اتۋمەن سايىستى قورىتىندىلادى. دوستىق تۋرنيرى بولعانىمەن، بارلىق كوماندا جەڭىس ءۇشىن بارىن سالىپ، قىزۋ باسەكەگە ءتۇستى. ءۇش كەزەڭنەن قۇرالعان جارىس قورىتىندىسىندا س.امانجولوۆ اتىنداعى شقمۋ قۇراماسى توپ جاردى. باسپا ءسوز حاتشىلارى جۇلدەلى ەكىنشى ورىندى يەلەنسە، «ۆەستنيك كازسينكا» گازەتى ءۇشىنشى ورىننان كورىندى. جەڭىمپاز بەن جۇلدەگەرلەردى ماراپاتتاۋ راسىمىنە ««ALTAI»» تەلەارناسىنىڭ ديرەكتورى ايدا جاباعييەۆا قاتىستى.

– بارلىقتارىڭىز ءبىر كىسىدەي ات سالىسىپ، ارنامىزدىڭ 60-جىلدىعىن اتاپ وتۋگە جينالعاندارىڭىزعا العىس بىلدىرگىم كەلەدى. دوستىق جارىسىمىز وتە قىزىقتى ءوتتى دەگەن ويدامىن. قازىرگى «التاي» بۇرىنعى «قازاقستان-وسكەمەن» تەلەارناسى ۇنەمى بىلىكتى ماماندار دايارلاپ كەلەدى. ءبىرقاتار تۇلەكتەرىمىز رەسپۋبليكالىق دەڭگەيدەگى ارنالاردا قىزمەتتە. مۇنىڭ ءبارى، ارينە، سىزدەردىڭ دە قولداۋلارىڭىز دەپ بىلەمىن، – دەدى ايدا جاباعييەۆا.