وسكەمەندەگى ورتالىق مادەنيەت ۇيىندە 12-13 مامىر كۇندەرى مۇمكىندىگى شەكتەۋلى جانداردان قۇرىلعان بي ۇجىمدارى اراسىندا VII رەسپۋبليكالىق بايقاۋ بولىپ ءوتتى. وعان استانا، الماتى، قوستاناي، قاراعاندى، تاراز، تاعى دا باسقا ەلىمىزدىڭ 12 ءوڭىرىنىڭ تالانتتى بيشىلەرى قاتىسىپ، بي ونەرىنىڭ قۇدىرەتى ارقىلى قالىڭ كورەرمەننىڭ قوشەمەتىنە بولەندى.

شارانى ۇيىمداستىرۋشى مۇگەدەكتەر ۇيىمىنىڭ باسشىسى ەلەنا اناتوليەۆنا باۋستىڭ ايتۋىنشا، بايقاۋدىڭ العاشقى كۇنىندە ەلىمىزدىڭ تۇكپىر-تۇكپىرىنەن جينالعان 120 ونەرپاز سيقىرلى دا سىرلى بي ونەرىندەگى تالانتتارىن ورتاعا سالىپ، «حالىقتىق بي» جانە «زاماناۋي بي» اتالىمدارى بويىنشا سىنعا ءتۇستى.

بايقاۋ ناتيجەسىندە قازىلار القاسىنىڭ شەشىمىمەن جوعارى كاسىبي شەبەرلىگى ءۇشىن اقتوبەلىك «جالىن»، وسكەمەندىك «مەچتا» بي انسامبلدەرى 1-ورىن، مادەنيەت پەن ونەردىڭ ورداسى – الماتى قالاسىنان كەلگەن «ورلەۋ» توبى مەن سەمەيلىك «ءبيشى ارۋلار» توبى -2 ورىن، تالدىقورعاندىق «جەتىسۋ» مەن قاراعاندىلىق «مەرۋەرت» ءان-بي انسامبلدەرى جۇلدەلى 3 ورىنعا يە بولدى.

ال «كوكتەم» بيىمەن كورەرمەندەردى وزىنە باۋراپ العان قوستانايلىق «توميريس» توبى باس جۇلدەگە يە بولىپ، رەسپۋبليكالىق بايقاۋدىڭ جەڭىمپازى اتاندى. بارلىق جۇلدەگەرلەر مەن جەڭىمپاز كوماندا ارنايى كۋبوك، ديپلومدارمەن جانە قارجىلاي سىيلىقتارمەن ماراپاتتالدى.

شارا ۇيىمداستىرۋشىلارى ونەرپازداردى كولىكپەن، تاماقتاندىرۋمەن جانە قارجىلاي قول ۇشىن بەرگەن «كازسينك» ج ش س، «پيسسا بليۋز»، «باقىرشىق كەن-بايىتۋ كاسىپورنى»، وبلىستىق مادەنيەت جانە مۇراعاتتار باسقارماسى، «نۇر ىسكەر» ج ش س، «نۇر وتان» پارتياسى فيليالى، «شىعىس تاڭى» ج ش س سىندى دەمەۋشىلەرىنە العىس ايتتى.