سەمەيدە ق ر پرەزيدەنتىنىڭ جۇلدەسىنە ارنالعان «قازاقستان بارىسى-2018» رەسپۋبليكالىق تۋرنيرىنە ىرىكتەۋ جارىس وتكىزىلدى. وبلىستىق سايىسقا شىعىس قازاقستاننىڭ بارلىق وڭىرلەرىنەن كىل مىقتى پالۋاندار جينالدى.

اتاپ ايتقاندا ىرىكتەۋ باسەكەسىندە ايماقتىڭ 20-دان اسا ۇزدىك ساڭلاقتارى كۇش سىناسىپتى. ولاردىڭ اراسىندا رەسپۋبليكالىق جانە حالىقارالىق جارىستاردا ولجا سالىپ جۇرگەن سپورتشىلار دا بولدى.

ءابسوليۋتتى سالماقتا وربىگەن بەلدەسۋلەر تارتىستى ءوتتى. ايتسە دە بيىلعى سايىستادا ايبەك نۇعىماروۆقا تەڭ كەلەر جان تابىلعان جوق. شىعىستىڭ شىمىر ۇلى بۇل جولىدا ەرلەدى. اقتىق سىندا ول بارقىتبەلدىڭ ساڭلاعى ماقسات مازىبايەۆتان ايلاسىن اسىردى. ال ءۇشىنشى ورىنعا تاعى ءبىر ساقا پالۋان ابايلىق ەرلان كونكييەۆ تۇراقتادى. وسىلايشا «شىعىس بارىسى-2018» تۋرنيرىندە توپ جارعان ايبەك، بيىلعى «قازاقستان بارىسى» جوباسىندا ءوڭىر نامىسىن قورعاماق.

ايتا كەتەيىك، شىعىسقازاقستاندىق شەبەر بۇعان دەيىن «قازاقستان بارىسى» جانە «الەم بارىسى» سىندى دودالاردا جەڭىمپاز اتانعان ەدى. سول سەكىلدى جەرلەسىمىز الەم جانە ازيا بىرىنشىلىكتەرىندە التىن تۇعىرعا بىرنەشە مارتە كوتەرىلدى. بۇل ورايدا ول قازاقستاننىڭ ەڭبەك سىڭىرگەن سپورت شەبەرى ەكەنىن ايتا كەتكەن ورىندى.