باسكول اۋىلىندا مايدانگەرلەرگە ارنالىپ مەموريالدىق ەسكەرتكىش ورناتىلدى. بيىكتىگى 7 مەتردى، ەنى 10 مەتردى قۇرايتىن مونۋمەنتتىڭ قۇرىلىسىنا جارتى ميلليونداي قاراجات جۇمسالعان ەكەن. يگىلىكتى شاراعا سوعىس جانە تىل ارداگەرلەرى، سونداي-اق، سەمەي، الماتى مەن استانا قالالارىنان كەلگەن مەيماندار جانە جەرگىلىكتى بيلىك وكىلدەرى جينالدى.

مەموريالدى ەسكەرتكىشكە ءمارماردان جاسالعان تاقتا ورناتىلىپ، وعان جەرگىلىكتى مايدانگەرلەردىڭ ەسىمى جازىلىپتى. ال ونىڭ الدىنا تىزەرلەپ تۇرعان جاۋىنگەردىڭ ءمۇسىنى قويىلعان. بۇل وتتى جىلدارى انتىنا بەرىك، رۋحى قايسار جاننىڭ بەينەسى بولسا كەرەك. وسى رەتتە ادامزات تاريحىنداعى الاپات سوعىسقا باسكول جانە قاراقۇدىق اۋىلدارىنان 300 ازامات اتتانعانىن ايتا كەتكەن ورىندى. سولاردىڭ اراسىنان 84 ساربازعا وتانىنا ورالۋ بۇيىرماعان ەكەن. قالعان 216 جاۋىنگەر دە بۇگىن ارادا جوق. ايتسە دە، ىنتىماعى جاراسقان قاراعايلى ءوڭىردىڭ حالقى جەرلەستەرىن ۇمىتقان ەمەس. بۇعان 300 ەردىڭ ەسىمى تۇگەلدەي جازىلعان ەسكەرتكىش مونۋمەنتى دالەل.

باسكولدىكتەردىڭ قان مايدانداعى ەرلىگىن جاڭعىرتۋ ماقساتىندا، «اكەلەر رۋحىنا تاعزىم» كىتابىنىڭ تانىستىرىلىمى وتكىزىلدى. بۇل ەڭبەكتى وسى ءوڭىردىڭ تۋمالارى رۋسلان ناسىروۆ پەن ليۋسيا حاميتوۆا جازىپ شىققان. ازىرگە اتالمىش تۋىندى ساناۋلى دانامەن باسىلىپتى. الداعى ۋاقىتتا وعان تولىقتىرۋلار ەنگىزىلىپ، كولەمىن ۇلعايتۋ قاراستىرىلىپ وتىر.

-سوعىسقا ءبىزدىڭ اۋىلىمىزدان كوپتەگەن ازاماتتار كەتتى. ونىڭ زاردابىن ءار وتباسىعا ءتيدى دەسەم قاتەلەسپەيتىنىم انىق. قانشاسى ۇرىس الاڭىنان ورالمادى. مەنىڭ اكەم ادىحان بايكانوۆ پەن ونىڭ ءىنىسى احتان بايكانوۆ مايدان دالاسىندا قازا تاپتى. تەك ءبىرى ءىنىسى قادىر بايكانوۆ قايتىپ كەلدى. باسكول ورتا مەكتەبىندە سوعىس ارداگەرلەرىنە ارنالعان مۋزەي جۇمىس ىستەيدى. بۇل قۋانتىپ وتىر. ويتكەنى جاس ۇرپاق جەڭىمپاز اتالارىن ءبىلىپ وسسە جامان بولمايدى. كەرىسىنشە وتانىنا ادال ازاماتتار بولىپ تاربيەلەنەدى دەگەن ويدامىن. ەسكەرتكىش تياناقتى جاسالعان ەكەن. وسىعان ءبىز العىس ايتامىز، — دەدى تىل ارداگەرى مارۆاتجان بايكانوۆ.

بيىل ەلوردانىڭ 20 جىلدىق مەرەيتويى اتالىپ وتىلەتىنى ءمالىم. تورقالى داتاعا وراي، قازىنالى قاريالار مەن الىس-جاقىننان كەلگەن قوناقتار، ەسكەرتكىشتىڭ ماڭىنا 20 ءتۇپ جاس شىرشا اعاشتارىن وتىرعىزدى.