شىعىس قازاقستاندا دەنساۋلىق ساقتاۋ مەكەمەلەرىن سيفرلاۋ بويىنشا جۇمىستار اياقتالىپ قالدى. سوڭعى مالىمەتتەرگە سۇيەنسەك، شقو-داعى مەملەكەتتىك اۋرۋحانالاردىڭ 97%-ى قاعازسىز قۇجات اينالىمىنىڭ مەديسينالىق اقپاراتتىق جۇيەسىن (ماج) ەنگىزىپ قويعان.

وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى يلياس مۇحامەدجاننىڭ ايتۋىنشا، كەلەسى كەزەڭ دەنساۋلىق ساقتاۋ مينيسترلىگىنىڭ دەڭگەيىندە ەكەن، ياعني ارنايى ەلەكتروندى سەرۆيس (پلاتفورما) ەنگىزۋ، ونىڭ نەگىزىندە دەنساۋلىقتىڭ ەلەكتروندى پاسپورتى جۇمىس ىستەيتىن بولادى. مۇنىڭ بارلىعى باعدارلامالىق جاساقتاماعا بايلانىستى، ءقازىر بۇل ماسەلە شەشىلۋدە.

-دەنساۋلىقتىڭ ەلەكتروندى پاسپورتى نەگىزىندە ەلەكتروندى جولدامالار مەن رەسەپتىلەردى جۇزەگە اسىرۋ جوسپارلانىپ وتىر. بۇل جۇمىستار اعىمداعى جىلدىڭ ەكىنشى توقسانىندا اياقتالماق، — دەيدى يلياس مۇحامەدجان. – جىلدىڭ سوڭىنا دەيىن پيلوتتىق اپروباسيا جۇزەگە اسىرىلىپ، ەلەكتروندى پاسپورت كەزەڭمەن ەنگىزىلە باستايدى، ەل بويىنشا 2020 جىلعا قاراي تولىق قامتىلادى.

وبلىس حالقىنىڭ 86%-ى مەديسينالىق قىزمەتتى ينتەرنەتى بار اۋرۋحانالاردان الاتىنى بەلگىلى. عالامتور جەلىسىنە شالعايداعى اۋدانداردىڭ اۋرۋحانالارىنىڭ قۇرامىنا كىرەتىن اۋىلدىق دارىگەرلىك امبۋلاتوريالار، مەدپۋنكتەر مەن فەلدشەرلىك-اكۋشەرلىك پۋنكتەر عانا قوسىلماعان. يلياس مۇحامەدجاننىڭ ايتۋىنشا، بۇل ماسەلەنى سپۋتنيكتىك ينتەرنەت-ارنالار ارقىلى شەشۋگە بولادى.