وسكەمەندە دزيۋدودان كسرو-نىڭ سپورت شەبەرى تالعات اقتايەۆتى ەسكە الۋعا ارنالعان اشىق ەل بىرىنشىلىگى ءوتىپ، وعان 23 جاسقا دەيىنگى 300-گە جۋىق سپورتشى قاتىستى.

بىرىنشىلىكتە قازاقستاندىق دزيۋدوشىلارمەن قاتار، رەسەي مەن قىرعىزستاننان كەلگەن تاتامي شەبەرلەرى دە ونەر كورسەتتى. ەكى كۇنگە سوزىلعان باسەكە قورتىتىندىسى بويىنشا شىعىسقازاقستاندىق سپورتشىلار قورجىنعا جەتى جۇلدە سالدى. اتاپ ايتساق، عابيت داۋلەتبايەۆ 81 كەلىگە دەيىنگى سالماق دارەجەسىندە جانە جاسۇلان مۇحامەتحانوۆ (100 كەلىگە دەيىن) بارلىق قارسىلاسىن تىزە بۇكتىرىپ، جارىس جەڭىمپازدارى اتانسا، 48 كەلىگە دەيىنگى سالماقتا ونەر كورسەتكەن ايدانا بۇعىلبايەۆا مەن ەۆگەنيي كياشكوعا (100 كەلى دەيىنگى سالماق) كۇمىس مەدالدار بۇيىردى. قولا جۇلدەگە داۋرەن دۋلاتوۆ (81 كەلىگە دەيىن)، الماس اكراشيەۆ (90 كەلىگە دەيىن) پەن ايان رامازانوۆ (100 كەلىگە دەيىن) يەلىك ەتتى.

– بۇل دوداعا تىڭعىلىقتى دايىندالدىم. قارسىلاستارىمنىڭ ءبارى مىقتى بولدى. الايدا دەگەنىمە جەتتىم. بارلىق جەتىستىگىم جاقىندارىمنىڭ، باپكەرلەرىم دۋمان بۇلعىنبايەۆ پەن باقىتبەك دۋانوۆتىڭ ارقاسى، – دەدى جارىس جەڭىمپازدارىنىڭ ءبىرى، وسكەمەندەگى دزيۋدو ورتالىعىنىڭ تاربيلەنۋشىسى عابيت داۋلەتبايەۆ.

ايتا كەتەيىك، عابيت وسىعان دەيىن بىرنەشە رەسپۋبليكالىق جانە حالىقارالىق جارىستىڭ جۇلدەگەرى اتانىپ ۇلگەرگەن. ول، سونىمەن قاتار دزيۋدودان ەلىمىزدىڭ سپورت شەبەرى اتاعىنا دا يە.

ال جارىس قورىتىندىلارىنا كەلەر بولساق، جالپىكوماندالىق ەسەپتە الماتى وبلىسىنىڭ قۇراماسى توپ جارسا، ەكىنشى ورىنعا اتىراۋلىق دزيۋدوشىلار يە بولدى. ءبىزدىڭ جەرلەستەر، شىعىس قازاقستان وبلىسىنىڭ قۇراماسى ۇزدىك ۇشتىكتى تۇيىندەدى.