قالامىزداعى شاكارىم اتىنداعى مەملەكەتتىك ۋنيۆەرسيتەتىندە استانا قالاسىنىڭ 20 جىلدىق مەرەيتويىنا ورايلاستىرىلىپ، سەمەي پىكىرسايىسشىلارى اراسىندا ەڭ مىقتى، ەڭ ۇيىمشىل بۋىن وكىلدەرىن انىقتاۋ ماقساتىندا «ستۋدەنتتىك بۋىندار 2018» قالالىق پىكىر-سايىس ءتۋرنيرى ءوتتى.

تارتىسقا تولى جارىستا بيىلعى جىلدىڭ پىكىر-سايىس تۇلەكتەرى «پورتۋگاليا»، 1ء-شى كۋرستار «بەلگيا»، جاس بۋىندار «رەسەي» جانە دە ورتا بۋىن «گەرمانيا» قۇرامالارى بولىپ ءبولىنىپ، ءوز ارالارىندا كىل مىقتىلاردى انىقتادى. تۋرنير بارىسىندا قاتىسۋشىلار لد، پدف، كارل-پوپپەر، بپف، اپف سىندى فورماتتاردىڭ بارلىعىن ويناپ، وزدەرىنىڭ جان-جاقتىلىعىن كورسەتتى.

ءاربىر راۋندتا ءسوزدى بىردە سالقىنداتىپ، بىردە وتتاي جالىنداتىپ، تاپقىرلىقپەن ءسوز سۋرەتىن سالعان پىكىرسايىسشىلار «ب.پ حالىقارالىق اقپارات پورتالىن قۇرۋدى قولدايدى»، «ب.پ بىرىككەن ۇلتتار ۇيىمى تاراپىنان تەرروريستەردىڭ ورتالىعى بولىپ تابىلاتىن «يكس» قالانى بومبالاۋعا رۇقسات بەرەدى»، «ب.پ قازاقستان رەسپۋبليكاسىنداعى بارلىق حالىقتى بىرىكتىرەتىن ەڭ ۇلكەن بىرىكتىرۋشى كۇشتى اتايدى»دەگەن قارالارعا وزدەرىنىڭ يدەيالارى مەن تىڭ ويلارىن بىلدىرە وتىرىپ، چەمپيون اتانۋ ءۇشىن بار كۇشتەرىن سالدى.

جارىستىڭ قورىتىندىسىنا سايكەس، ورتا بۋىن اتىنان شىققان 3 كۋرس ستۋدەنتتەرى جەڭىس تۇعىرىنىڭ بيىك ساتىسىنا كوتەرىلىپ، كۋبوكتى قانجىعالارىنا بايلادى. ال، كومانداسىنا ەڭ كوپ ۇپاي اكەلگەن «سالاۋات» ينتەللەكتۋالدى دەبات كلۋبىنىڭ جاس بۋىنى ۇلاعات ومەك بولسا «ەڭ ۇزدىك ويىنشى» نوميناسياسىن جەڭىپ الدى.