بارلىعىمىز بىلەتىندەي ءار دەمالىس سايىن سەمەي شاھاراىندا ءبىرقاتار اۋىلدىق ەلدى مەكەندەر قالا تۇرعىندارىنا ەش قوسپاسىز اۋىلدىڭ تابيعي تاعامدارىن حالىققا قولجەتىمدى باعادا ۇسىنۋ ماقساتىندا كوپتەگەن جارمەڭكەلەر ۇيىمداستىرىلىپ كەلەدى.

وسىنداي جاقسى ءۇردىس كەشە دە جالعاسىن تاۋىپ «سيەۆەرنىي» ساۋدا لوگيستيكالىق ورتالىعىندا ابىرالى، جازىق، پريرەچنىي جانە تاعى دا باسقا اۋىلدىق وكرۋگتەردىڭ قاتىسۋىمەن اۋىلشارۋاشىلىق ونىمدەرىنىڭ جارمەڭكەسى ءوتتى. سەمەي وڭىرىنە قاراستى 16 اۋىلدىق وكرۋگىنەن جەتكىزىلگەن قىمىز، ەت، ءسۇت ونىمدەرى تومەن باعادا ساۋدالاندى. تاڭەرتەڭنەن جارمەڭكەگە اسىققان ادامداردىڭ قاراسى قالىڭ بولدى. حالىققا ۇسىنىلعان ازىق-تۇلىكتىڭ باعاسى دا بازارداعىدان ءبىرشاما ارزان بولعاندىقتان، بارلىق اكەلىنگەن تاماقتار جارتى ساعات وتپەي جاتىپ تەز ارادا ساتىلىپ كەتتى. ماسەلەن، تاڭەرتەڭ ەرتە كەلگەن سەمەي جۇرتشىلىعى قوي ەتىنىڭ 1 كەلىسىن 1300-دەن، سيىر ەتىن 1400، ال جىلقىنىكىن 1500 تەڭگەدەن ساتىپ الۋ مۇمكىندىگىنە يە بولدى.

— ءبىز جىل سايىن وسىنداي جارمەڭكە ءار جەكسەنبى جانە سەنبى كۇندەرى وتەتىنىن تاڭىستارىمىزدان ءجيى ەستيتىنبىز. ال، بۇگىن كۇيەۋىمىز ەكەۋمىز ارزان باعادا ەت ساتىپ الۋ ءۇشىن كەلدىك. بارلىق تاعامداردىڭ باعاسى وتە جاقسى، قاراپايىم تۇرعىندارعا قولجەتىمدى دەپ ويلايمىن. ەگەردە كەلەسى جولى تاعى دا اۋىلدىق وكرۋگتەردىڭ جارمەڭكەسى وتكىزىلەتىن بولسا، مىندەتتى تۇردە كەلەتىن بولىپ شەشتىك، — دەيدى قالا تۇرعىنى رايحان ايتقوجينا.