وسكەمەن قالاسىنىڭ اكىمى قۋات تۇمابايەۆ سوت پروسەسستەرى  اياقتالعانشا ەڭبەك دەمالىسىنا كەتەتىنى تۋرالى مالىمدەمە جاسادى، دەپ حابارلايدى التاينيۋس.

"قۇرمەتتى وسكەمەندىكتەر، جۋىقتا بولعان جول-كولىك وقيعاسىنا بايلانىستى كوپتەگەن ماتەريالدار جينالدى. مەن جول اپاتىنا كۋا بولدىم، مارقۇمنىڭ تۋىستارىنا شىن كوڭىلمەن قايعىرا وتىرىپ كوڭىل ايتامىن. وسىعان بايلانىستى مەنىڭ اينالامدا كوپتەگەن قاڭقۋ سوزدەر تاراي باستادى.مەملەكەت قىزمەت ساپىندا جۇرگەندىكتەن مەنىڭ ىس-ارەكەتتەرىم ەڭ الدىمەن قوعامداعى سەنىمدى كۇشەيتۋگە باعىتتالۋى ءتيىس. سول سەبەپتەن مەن تەرگەۋ جۇمىستارى  كەزەڭىندە جالاقىم ساقتالمايتىن ەڭبەك دەمالىسىنا كەتۋ تۋرالى شەشىمگە كەلدىم"، - دەدى قۋات تۇمابايەۆ.

ەندى وسكەمەن قالاسى اكىمىنىڭ مىندەتىن ۋاقىتشا ولگا بۋلاۆكينا اتقارادى.

ەستەرىڭىزگە سالا كەتەيىك، 15 ءساۋىر كۇنى كۇنى كەشكى ساعات 9 شاماسىندا ريددەر قالاسىندا 1999 جىلعى ازاماتتى كولىك قاعىپ، ول جەدەل جاردەم كەلمەي تۇرىپ، وقيعا ورنىندا قازا تاپقان بولاتىن. ال شەتەلدىك اۆتوكولىك جۇرگىزۋشىسى ريددەر قالاسى اكىمىنىڭ ورىنباسارى باۋىرجان قۇرمانبايەۆ بولىپ شىققان. تەكسەرۋ جۇمىستارى ونىڭ كولىكتى ماس كۇيىندە تىزگىندەگەنىن كورسەتكەن. كەيىن ونىڭ جانىندا وسكەمەن قالاسىنىڭ اكىمى قۋات تۇمابايەۆ بولعانى انىقتالدى.