شىعىسقازاقستاندىق «Altay athletics» كاسىبي جەڭىل اتلەتيكا كلۋبىنىڭ وكىلى كارولين كيپكيرۋي كاتار استاناسى دوحادا وتكەن بيىلعى «گاۋحار ليگا» جارىسىنىڭ العاشقى كەزەڭىندە جەڭىس تۇعىرىنان كورىندى.

ءبىزدىڭ سپورتشى ءۇش مىڭ مەترلىك قاشىقتىقتى بارىنەن بۇرىن جۇگىرىپ ءوتىپ، جارىس جەڭىمپازى اتاندى. ايتا كەتەيىك،بۇل سىنعا «Altay athletics» كلۋبىنىڭ تاعى ءبىر وكىلى نورا دجەرۋتو دا قاتىسقان بولاتىن. الايدا، نورا بۇل جولى ۇزدىكتەر قاتارىنان كورىنە المادى. جارىس جەڭىمپازىنان سەگىز سەكۋندقا قالىپ قويعان ول مارە سىزىعىن ونىنشى بولىپ كەستى. ال سايىستا توپ جارعان كارولين كيپكيرۋي بولسا، جارىس جولىن 8 مينۋت 29 سەكۋندتا جۇگىرىپ ءوتتى.

وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتى حابارلاعانداي، «Altay athletics» جەڭىل اتلەتيكا كلۋبىنىڭ كاپيتانى ءارى ليدەرى ولگا رىپاكوۆا مەن تاعى ءبىر بەلدى مۇشەسى دەيزي دجيپكەمەي «گاۋھار ليگانىڭ» كەلەسى كەزەڭدەرىندە ونەر كورسەتپەك.