بۇل كۇندەرى ەلوردامىزدىڭ «داۋلەت» سپورت كەشەنىندە بوكستان قازاقستان رەسپۋبليكاسىنىڭ پرەزيدەنتى كۋبوگى ءوتىپ جاتىر. 15 ەلدىڭ 162 بوكسشىسى قاتىسىپ جاتقان تۋرنيردە «استانا» پرەزيدەنتتىك كاسىبي سپورت كلۋبىنىڭ قۇرامىنا كىرەتىن «استانا ارلاندارى» كومانداسى دا بار.

ايتا كەتەيىك، تۋرنير جەڭىمپازدارىنا قازاقستان بوكس فەدەراسياسى 2000 اقش دوللارىنان تاعايىنداعان. ەكىنشى ورىن يەگەرلەرى 1000 دوللارعا يە بولسا، جارتىلاي فينالعا جەتكەندەر 500 دوللاردان الادى. جالپى، جۇلدە قورىن ايتپاعاندا، ءتۋرنيردىڭ مارتەبەسى وتە جوعارى. سوندىقتان بولسا كەرەك، بيىل التىنشى رەت ۇيىمداستىرىلعان پرەزيدەنت كۋبوگىنا قازاقستاننىڭ بىرنەشە قۇرامىنان بولەك، بەلارۋس، ءۇندىستان، جاپونيا، قىرعىزستان، موڭعوليا، جۇڭگو، فيليپپين، رەسەي، شۆەسيا، تاجىكستان، تايلاند، تۇركمەنستان، وزبەكستان جانە مۇحيتتىڭ ارعى جاعىنان اقش قۇراماسى دا كەلگەن.

ال «استانا ارلاندارى» كومانداسى ءۇشىن ق ر پرەزيدەنت كۋبوگى دۇنيەجۇزىلىك بوكس سەرياسىنىڭ قارساڭىنداعى ماڭىزدى سىناقتاردى ءبىرى. بۇگىندە ەلوردامىزدىڭ «تارلان-ارەنا» سپورت كەشەنىندە دايىندىقتارىن پىسىقتاپ جۇرگەن «ارلاندار» پرەزيدەنت كۋبوگىنا تولىق قۇرامدا قاتىسۋدا.

بۇگىن ءتۋرنيردىڭ شيرەك فينالدىق جەكپە-جەكتەرى باستالدى. «استانا ارلاندارى» بوكسشىلارى ءۇشىن پرەزيدەنت كۋبوگى ءساتتى جالعاسۋدا. ماسەلەن، 56 كەلىدەگى قايرات ەرالييەۆ موڭعول بوكسشىسى مۋنحۋبااتار تساگانبااتاردى ويناپ ءجۇرىپ جەڭسە، ءدال وسى سالماقتاعى ءىلياس سۇلەيمەنوۆ تۇركمەن قارسىلاسى زاريب جۋمايەۆتى ءبىرىنشى نوكاۋدتا-اق باۋىردان ۇرىپ، تۇرا الماستاي ەتىپ، بۇكتەپ تاستادى. سول سياقتى، ابىلايحان ءجۇسىپوۆ، اسلانبەك شىمبەرگەنوۆ جانە قامشىبەك قوڭقابايەۆ تا ءوز جەكپە-جەكتەرىن جەڭىسپەن اياقتاپ، جارتىلاي فينالعا جولداما الدى.

ال ەرتەڭ شارشى الاڭعا شيرەك فينال اياسىندا تاعى ءبىر قاتار «ارلاندار» شىعادى. پرەزيدەنت كۋبوگى 11 ماۋسىم كۇنى مارەسىنە جەتپەك.