باس سانيتارلىق دارىگەر جانداربەك بەكشين مەنينگوكوكك ينفەكسياسىنىڭ الدىن الۋ ءۇشىن ۇبت-عا بايلانىستى كەڭەس بەردى.
«بۇل – وزەكتى ماسەلە. 20-30 ماۋسىم ارالىعىندا 147 مەكەمەدە ۇلتتىق ءبىرىڭعاي تەستىلەۋ وتەدى. وسىعان وراي ءبىلىم مينيسترلىگىمەن شارانى وتكىزۋ جولدارىن اقىلداسىپ جاتىرمىز. ۇبت تاپسىراتىنداردىڭ سانى كوپ جانە تەستىلەۋ ءتورت ساعاتقا دەيىن سوزىلادى»، - دەدى بەكشين ورتالىق كوممۋنيكاسيالار قىزمەتىنىڭ بريفينگى بارىسىندا.
بەكشيننىڭ ايتۋىنشا، ۇبت مەديسينا قىزمەتكەرلەرىنىڭ باقىلاۋىمەن وتەتىن بولادى.
«ۇبت ۇيىمداستىرۋشىلارىنا الدىن الا دايىندىق جۇمىستارىن تۇپكىلىكتى جۇرگىزۋدى تاپسىردىق. مەكەمە ىشىندە دەزينفەكسيالاۋ قۇرالدارىن پايدالانۋ ارقىلى ىلعالدى تازالاۋ جۇمىستارىن جۇرگىزىپ، ءىشىن جەلدەتۋ قاجەت. تازالاۋ جۇمىستارىن جۇرگىزەردە تەرەزەلەردىڭ اشىق تۇرعانى ءجون»، - دەدى ول.
بەكشيننىڭ سوزىنشە، بۇل پروسەستەر جۇقپالى دەرتتى بولدىرماۋدىڭ وڭتايلى ءادىسى.
