بۇگىن شىمكەنت قالاسىندا استانانىڭ 20 جىلدىعىنا وراي جاڭا فورماتتاعى جۇمىسپەن قامتۋ ورتالىعى اشىلدى. قالا تۇرعىندارى ءۇشىن پايدالانۋعا بەرىلگەن ورتالىق مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋى شەڭبەرىندە جۇزەگە اسىپ وتىر. ايتا كەتەرلىگى، وندا «جۇمىسپەن قامتۋ جانە الەۋمەتتىك قىزمەت تۇرلەرىن ءبىر تەرەزە قاعيداسى» بويىنشا قىزمەت كورسەتۋ ءۇشىن بىرنەشە مەكەمە توپتاستىرىلعان. اتاپ ايتقاندا، حالىقتى جۇمىسپەن قامتۋ ورتالىعى، شىمكەنت قالاسىنىڭ جۇمىسپەن قامتۋ جانە الەۋمەتتىك باعدارلامالار ءبولىمى مەن كاسىپكەرلىك ءبولىمى، سونداي-اق ازاماتتارعا ارنالعان ۇكىمەت مەملەكەتتىك كورپوراسياسى  وقو بويىنشا فيليالى جۇمىس ىستەۋدە.

ورتالىقتىڭ جۇمىسىمەن تانىسۋعا بارعان وبلىس اكىمى جانسەيىت تۇيمەبايەۆ ازاماتتارعا سيفرلىق فورماتتا كورسەتىلىپ جاتقان قىزمەت تۇرلەرىنە قانىق بولدى.  ونداعى قالا تۇرعىندارىمەن تىلدەسكەن ايماق باسشىسى جانسەيىت قانسەيىت ۇلى اتالعان باعىتتاعى جۇمىستاردى تاعى دا جانداندىرىپ، xالىقتىڭ كوڭىلىنەن شىعاتىنداي ەتىپ قىزمەت كورسەتۋدى تاپسىردى.

ايتا كەتەرلىگى، اتالعان ورتالىقتىڭ ەرەكشەلىگى - «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» شەڭبەرىندە شىمكەنت قالاسىنىڭ جۇمىسسىز جانە از قامتاماسىز ەتىلگەن وتباسىلار، جازاسىن وتەگەن ادامدار مەن ەڭبەككە قابىلەتى تومەن مۇمكىندىگى شەكتەۋلى جانداردى تۇراقتى جۇمىسپەن قامتۋ ماقساتىندا الەۋمەتتىك قولداۋعا باعىتتالعان.

بۇگىندە حالىقتى جۇمىسپەن قامتۋ ورتالىعى تولىعىمەن سيفرلىق فورماتتا جۇمىس ىستەۋدە. اتاپ ايتقاندا، ەلەكتروندى انىقتاما، وز-وزىنە قىزمەت كورسەتۋ ايماعى،  Call center جانە سيفرلى كابينەت قىزمەتتەرى بار.

قازىرگى تاڭدا 2018 جىلدىڭ جىلدىق جوسپارىنا سايكەس قالا حالقىنىڭ 3000-نان استام ازاماتى تۇراقتى جۇمىسپەن قامتىلسا، 1154 جاس تۇلەك جاستار پراكتيكاسىنا جولداما العان. قوعامدىق جۇمىسپەن 900-گە جۋىق ازامات قامتاماسىز ەتىلىپ وتىر.