تاجىكستاندا بۇدان بىلاي تەرروريزمدى قولداپ، تەراكت جاساۋعا اشىق شاقىرعاندار 10 جىلدان 15 جىلعا دەيىن باس بوستاندىعىنان ايىرىلۋى مۇمكىن.

تاجىكستان پارلامەنتى تومەنگى پالاتاسىنىڭ دەپۋتاتتارى 13 ماۋسىمدا قىلمىستىق كودەكستىڭ "تەررورلىق سيپاتتاعى قىلمىستاردى جاساۋعا شاقىرۋ جانە (نەمەسە) تەررورلىق ىس-ارەكەتتەردى جاريا تۇردە اقتاۋ" دەگەن 179-بابىنا ەنگىزىلگەن وزگەرىستەر مەن تولىقتىرۋلاردى ءبىر اۋىزدان ماقۇلدادى. اتالعان باپقا "ينتەرنەت ارقىلى" دەگەن ءسوز تىركەسى ەنگىزىلگەن. ياعني، الەۋمەتتىك جەلىلەر ارقىلى تەرروريزمگە ۇندەگەندەر ۇزاق مەرزىمگە باس بوستاندىعىنان ايىرىلادى.

تاجىكستاننىڭ سوت تاجىريبەسىندە Facebook-تە تەررورلىق سيپاتتا دەلىنگەن ماتەريالدارعا "لايك" باسقانى ءۇشىن جاۋاپقا تارتىلعان بىرنەشە وقيعالار بولعان.

تاجىكستانداعى تاۋەلسىزدىك باق-تىڭ ۇلتتىق قاۋىمداستىعى ءتوراعاسى نۋريددين كارشيبويەۆ قىلمىستىق كودەكسكە ەنگىزىلگەن وزگەرىستەردى ەكسترەميزم جانە تەرروريزمگە قاتىستى قىلمىستىق جازانى قاتايتۋ دەپ بىلەدى. ونىڭ سوزىنشە، وسىعان دەيىن كەيبىر زاڭدارعا ەنگىزىلگەن وزگەرىستەر بۇل ماسەلەگە تىكەلەي نە جاناما قاتىستى بولعان.

"كەز كەلگەن ەسى دۇرىس ادام تەرروريزم مەن ەكسترەميزمنىڭ پايدا بولۋىن قولدامايدى. ءبىراق قۇقىق قورعاۋ ورگاندارى زاڭ نورمالارىن دۇرىس تالدامايدى دەگەن ءقاۋىپ بار. سول ءۇشىن پارلامەنت وكىلدەرى حالىق اراسىندا دۇرىس ءتۇسىندىرۋ جۇمىستارىن جۇرگىزۋ كەرەك"، - دەيدى ول.