«الەۋمەتتىك مەديسينالىق ساقتاندىرۋ قورى» كەاق-نىڭ استانا قالاسى بويىنشا فيليالىنىڭ  مالىمەتى بويىنشا 2018 جىلدىڭ 1ء-شى ماۋسىمىنا قاراي مەديسينالىق مەكەمەلەرگە 1 ملن 056 مىڭ ادام تىركەلدى. جۇمىس بەرۋشىلەر اي سايىن 532،5 مىڭ ادام، ياعني ەلوردا تۇرعىندارىنىڭ 50 پايىزى ءۇشىن جارنا اۋداردى.    

سوڭعى 11 اي ىشىندە استانا قالاسىنىڭ تۇرعىندارى مىندەتتى الەۋمەتتىك ساقتاندىرۋ ءۇشىن 9 122،6 ملن تەڭگە كولەمىندە اۋدارىمدار جاسادى. بۇل سومانىڭ 7 869،4 ملن تەڭگەسى نەمەسە 86،2% جۇمىس بەرۋشىلەردىڭ قاراماعىنداعى قىزمەتكەرلەرى ءۇشىن جاساعان تولەمدەرى، ال قالعان 1253،2 ملن تەڭگە (13،8%) – جەكە كاسىپكەرلەر مەن ازاماتتىق-قۇقىقتىق نەگىزدە ەڭبەك ەتەتىن تۇلعالارعا تيەسىلى.

استانا قالاسى بويىنشا قازىرگى تاڭدا مەديسينالىق كومەك كورسەتۋدەن ۇمىتكەر دەنساۋلىق ساقتاۋ سۋبەكتىلەرىنىڭ دەرەكقورىنا 115 دەنساۋلىق ساقتاۋ ۇيىمى تىركەلدى. ونىڭ 42 مەملەكەتتىك جانە 73 جەكە مەنشىك مەديسينالىق ۇيىم. بيىل ەلوردالىق 79 مەديسينالىق مەكەمە كەپىلدەندىرىلگەن تەگىن مەديسينالىق قىزمەت كولەمى شەڭبەرىندە قىزمەت كورسەتۋگە ءوتىنىش بەردى. بۇل مەكەمەلەرمەن قور مەديسينالىق قىزمەت كورسەتۋ تۋرالى كەلىسىمشارت بەكىتتى.

2018 جىلى دەنساۋلىق ساقتاۋ جۇيەسىن قارجىلاندىرۋعا رەسپۋبليكالىق بيۋدجەتتەن 917 ملرد تەڭگە كولەمىندە قارجى ءبولىندى، ونىڭ 318 ملرد تەڭگەسى امبۋلاتورلىق-پوليكلينيكالىق كومەككە جۇمسالادى، ال باسىمدىق اۋرۋدىڭ الدىن الۋ شارالارىنا بەرىلەتىن بولادى.

2018 جىلدان بەرى الەۋمەتتىك مەديسينالىق ساقتاندىرۋ قورى  مەملەكەتتىك تاپسىرىس شەڭبەرىندە مەديسينالىق قىزمەتتەردى ساتىپ الاتىن ءبىرىڭعاي قارجىلىق وپەراتور بولىپ تابىلادى،وسىعان بايلانىستى جاڭا ەرەجەلەر مەن اقپاراتتىق جۇيەلەر ەنگىزىلىپ جاتىر. اتقارىلىپ جاتقان جۇمىستار مىندەتتى الەۋمەتتىك مەديسينالىق ساقتاندىرۋ جۇيەسىنە كەزەڭ-كەزەڭمەن وتۋگە باعىتتالعان شارالار.

جالپى، استانا قالاسىندا دەنساۋلىق ساقتاۋ جۇيەسىن قارجىلاندىرۋ ماسەلەسى جوسپارلى تۇردە شەشىلىپ جاتىر. مەديسينا مەكەمەلەرىنە جىل باسىندا مالىمدەلگەن قارجىلاندىرۋ كولەمىنىڭ 30 پايىزى اۆانس رەتىندە تولەندى.  قور مەديسينالىق ۇيىمدارعا جوسپارلى تولەمدەردى نورماتيۆتىك-قۇقىقتىق نەگىزدەرگە سايكەس اۋدارىپ جاتىر.