باتىس قازاقستان وبلىسى اكىمى التاي كولگىنوۆ شىڭعىرلاۋ جانە ءبورىلى اۋدانىنا جۇمىس ساپارىمەن باردى، دەپ حابارلايدى Qamshy.kz اقپارات اگەنتتىگى.  اكىم بۇعان دەيىن وبلىستاعى بىرنەشە اۋدانعا جۇمىس ساپارىمەن بارىپ، تۇرعىنداردىڭ تۇرمىس-تىرشىلىگىمەن جانە اۋدانداردىڭ ەكونوميكالىق جاعدايىمەن تانىسقان بولاتىن. 
شىڭعىرلاۋ اۋدانىنا جۇمىس ساپارى اياسىندا وبلىس اكىمى اششىساي اۋىلىندا «اقبۇلاق» باعدارلاماسى بويىنشا جۇرگىزىلىپ جاتىرعان سۋ قۇبىرىنىڭ قۇرىلىسىمەن تانىستى. بولىنگەن قارجى – 269 ملن. 759 مىڭ تەڭگە. قۇرىلىس نىسانى اياقتالعان سوڭ اۋىلدىڭ 500-گە جۋىق ءۇي تازا اۋىز سۋمەن قامتىلاتىن بولادى.
قۇرىلىس نىساندا ەڭبەك ارداگەرلەر مەن تۇرعىنداردىڭ قاتىسۋىمەن اۋدان اكىمى البەرت ەسالييەۆتىڭ شىڭعىرلاۋداعى الەۋمەتتىك-ەكونوميكالىق دامۋى جونىندە ەسەبى تىڭدالدى. ونىڭ مالىمدەۋىنشە، اۋداننىڭ ءتورت ەلدى مەكەنىندە سۋ قۇبىرىنىڭ جۇمىستارى جۇرگىزىلۋدە، اعىمداعى جىلدىڭ قورىتىندىسى بويىنشا اۋداننىڭ 86%ء-تى تازا اۋىز سۋمەن قامتىلاتىن بولادى. سونىمەن قاتار، اۋداندا جول، الەۋمەتتىك نىسانداردىڭ قۇرىلىسى جايلى مالىمەت بەرىلدى. 
سونداي-اق، وبلىس اكىمى مەملەكەتىك قولداۋىنىڭ ارقاسىندا جۇمىس ىستەپ جاتقان «عايني» شارۋا قوجالىعىنىڭ قۇس شارۋاشىلىعىن ارالاپ، اۋىل شارۋاشىلىق سالاسىنداعى ماماندارمەن كەزدەستى. «عايني» ش/ق باسشىسى جاسقايرات ايسييەۆ بولاشاقتا قۇس سانىن 8 مىڭعا جەتكىزۋدى جوسپارلاپ وتىرعانىن جەتكىزدى. وعان قوسا، قوجالىقتا زاماناۋي قوندىرعى ورناتىلعان (جەل جانە كۇن ساۋلەسىنەن ەنەرگيا كوزدەرىن الاتىن گيبريدتىك قوندىرعى) ايتتى. كەزدەسۋدە شارۋا قوجالىقتارىنىڭ باسشىلارى ءونىمدى ىشكى نارىقپەن قاتار سىرتقا شىعارۋدى كوزدەيتىنىن جەتكىزدى.
وبلىس اكىمى سونىمەن قاتار شىڭعىرلاۋ اۋىلىنىڭ شىعىس بولىگىندە «نۇرلى جەر» باعدارلاماسى بويىنشا سالىنىپ، پايدالانۋعا بەرىلگەن 30 تۇرعىن ۇيگە قونىستانعان تۇرعىندارىمەن كەزدەسىپ، «پاتريوت» سۋپەرماركەتىنىڭ جۇمىسىن باعالاپ، اۋىلىشىلىك اباتتاندىرۋ جۇمىستارىمەن تانىستى.
اۋداندىق دەمالىس ساياباق اۋماعىندا ورنالاسقان ورمان قورىنىڭ جەرلەرىن ەلدى-مەكەن جەرلەرىنە اۋىستىرۋ جۇمىسىمەن تانىسىپ، ساياباقتا اۋىل جاستارىمەن جۇزدەستى. بۇدان بولەك، وبلىس اكىمى اۋداندىق تاريحي-ولكەتانۋ مۋزەيىن ارالادى. ساپار سوڭىندا مەملەكەتتىك باعدارلامالاردى ناتيجەلى جۇزەگە اسىرۋ جانە اۋداننىڭ الەۋمەتتىك-ەكونوميكالىق دامۋ ماسەلەلەرى بويىنشا ءبىرقاتار ناقتى تاپسىرمالار بەرىلدى.

ءبورلى اۋدانىنا بارعان كولگىنوۆ اقساي قالاسى، پۋگاچيەۆ جانە ءبورلى اۋىلدىق وكرۋگتەرىندەگى ءوندىرىس ورىندارى مەن شارۋا قوجالىقتارىن، ءبىرقاتار قۇرىلىس نىساندارىن ارالادى.
الدىمەن اۋدان ورتالىعىندا ورنالاسقان «RT Alliance» جشس-نا بارىپ، سۇيىق ازوت ءوندىرۋ زاۋىتىنىڭ قۇرىلىسىمەن تانىستى. قۇنى 1 ملن. اقش دوللارىن قۇرايتىن زاۋىتتىڭ قۋاتتىلىعى جىلىنا 500 كگ/ساع. قازىرگى تاڭدا زاۋىتتىڭ قۇرىلىسى تولىق اياقتالىپ، ينجەنەرلىك جەلىلەر تارتىلۋدا. تاياۋ كۇندەرى ىسكە قوسىلاتىن ءوندىرىس وشاعى ەلىمىزدەگى «كپو ب.ۆ.» سياقتى كەن ءوندىرۋشى كومپانيالاردى تازا ازوتپەن قامتىماق.
اقساي قالاسىنداعى ءتورتىنشى جانە بەسىنشى شاعىن اۋدانداردىڭ جىلۋ جانە ىستىق-سالقىن سۋ جۇيەسىن قايتا قۇرىلىمداۋ جۇمىستارىمەن دە تانىستى. جوبا قۇنى - 576، 0 ملن. تەڭگە. جالپى ۇزىندىعى 32 418 مەتردى قۇرايتىن سۋ جۇيەلەرىنىڭ قۇرىلىسى بيىلعى قىركۇيەك ايىندا اياقتالماق.
اقسايداعى شەشىمىن كۇتكەن وزەكتى ماسەلەنىڭ ءبىرى – جولدىڭ جايى ەكەنى بەلگىلى. كەزدەسۋ بارىسىندا وبلىس اكىمى التاي كولگىنوۆ جاقىندا وبلىسقا جۇمىس ساپارىمەن كەلگەن ەلباسى ن. نازاربايەۆتىڭ اقساي باعىتىنا قاتىنايتىن جول قۇرىلىسىن سالۋعا ۇلكەن قولداۋ كورسەتكەنى تۋرالى قۋانىشتى حاباردى جەتكىزىپ، ءقازىر ق ر ينۆەستيسيالار جانە دامۋ مينيسترلىگىمەن جوبالىق سمەتالىق قۇجاتتار دايىندالىپ جاتقانىن، كەلەر جىلى اقساي ارقىلى ورالدان ورىنبورعا دەيىن ءتورت جولاقتى اۆتوجول سالىناتىنىن ايتتى.
جۇمىس ساپارى اياسىندا وبلىستىق ماڭىزى بار 90 شاقىرىمدىق اقساي-جىمپيتى تاس جولىن جوندەۋ جۇمىستارىن تەكسەردى. مەردىگەر «يۋنيسەرف» ج ش س، جوبانىڭ ءبىرىنشى كەزەڭىندە 38-53 شاقىرىمدا (15 شاقىرىم) جول جوندەۋ جۇمىستارىن «اقسايبيزنەسستروي» ج ش س ىسكە اسىرۋدا، جوبانىڭ سوماسى 1 958،014 ملن تەڭگە. ەكىنشى كەزەڭدە 53-68 شاقىرىم (15 شاقىرىم) جوندەۋ جۇمىستارىمەن «اسفا» ج ش س اينالىسۋدا. بۇل جوبانىڭ جالپى سوماسى 1 943،729 ملن تەڭگە.
جوندەۋ جۇمىستارىنىڭ بارىسىن پىسىقتاپ، قوسالقى مەردىگەرلەرمەن تىلدەسكەن وبلىس اكىمى جۇمىستىڭ ساپالى ءارى ۋاقتىلى جۇرگىزىلۋىن تاپسىردى. قۇرىلىس ماتەريالى مەن جۇمىس كۇشىنىڭ جانە تەحنيكانىڭ جەتكىلىكتى ەكەندىگىن ايتقان قوسالقى مەردىگەرلەرلەر وزدەرىنە تيەسىلى ۋچاسكەنى تامىز ايىنىڭ سوڭىنا دەيىن اياقتاۋعا ۋادە بەردى.
سونداي-اق، اقساي شاھارىنداعى كەزەكتى قۇرىلىس اقساي تەحنيكالىق كوللەدجى جاتاقحاناسىندا جۇرگىزىلۋدە. اپاتتى جاعدايدا تۇرعان بۇرىنعى ەسكى جاتاقحانا ورنىنا بەس قاباتتى 124 پاتەرلىك جاڭا تۇرعىن ءۇي بوي كوتەرۋدە. جوبا قۇنى – 635 423،0 مىڭ تەڭگە. بۇگىنگى تاڭدا ىشكى ارلەۋ جۇمىستارى قالعان جاتاقحانا شىلدە ايىندا پايدالانۋعا بەرىلىپ، بۇرىنعى اپاتتى ءۇيدىڭ 70 وتباسىنا قوسا بيۋدجەتتىك سالا ماماندارى دا باسپانالى بولماق.
وبلىس اكىمى التاي كولگىنوۆكە تانىستىرىلعان تاعى ءبىر قۇرىلىس نىسانى اۋداندىق ىشكى ىستەر ءبولىمىنىڭ «شۇعىل باسقارۋ ورتالىعى» بولدى. «كپو ب.ۆ.» كومپانياسىنىڭ الەۋمەتتىك تاپسىرىسى اياسىنداعى جوبانىڭ جالپى قۇنى 132 371،0 مىڭ تەڭگە.
ءۇش قاباتتى عيماراتتىڭ تومەنگى قاباتىندا قۇقىق قورعاۋ قىزمەتكەرلەرىنە ارنالعان جۇمىس بولمەلەرى، جاتتىعۋ زالدارى مەن تير الاڭدارى ورىن تەپسە، ەكىنشى قاباتى تولىعىمەن شۇعىل باسقارۋ ورتالىعىنا ارنالىپ، جابدىقتالعان. عيماراتتىڭ جوعارى قاباتىندا قۇقىق قورعاۋ قىزمەتكەرلەرىنە ارنالعان قىزمەتتىك پاتەرلەر ورنالاسقان. سونىمەن قاتار، جاقىن ارادا اقساي قالاسىنىڭ كوشەلەرىنە «ءقاۋىپسىز قالا» باعدارلاماسى اياسىندا 100-دەن استام بەينەكامەرا قويىلىپ، شاھاردىڭ قاۋىپسىزدىگى وسى اتالعان شۇعىل باسقارۋ ورتالىعى ارقىلى باسقارىلىپ وتىرادى.
ساپار بارىسىندا وبلىس اكىمى اقسايداعى 240 ورىندىق بالاباقشا جانە ءبورلى اۋىلىنىڭ دەنە شىنىقتىرۋ-ساۋىقتىرۋ كەشەنىنىڭ قۇرىلىستارىن تەكسەردى. اتالمىش نىساندار اعىمداعى جىلدىڭ تامىز ايىندا پايدالانۋعا بەرىلەدى. 
سونداي-اق، پۋگاچيەۆ اۋىلىندا ورنالاسقان «امانات» شارۋا قوجالىعىنىڭ ءسۇت فەرماسىنىڭ قۇرىلىسىمەن تانىستى. 600 باس ءىرى قارا مالعا ارنالعان فەرمانىڭ قۇرىلىسى جىلدىڭ سوڭىنا دەيىن اياقتالادى. ينۆەستيسيالىق جوبانىڭ قۇنى – 2،5 ملرد. تەڭگە.
جۇمىس ساپارىنىڭ سوڭىندا وبلىس اكىمى اۋدان الەۋەتىن تولىق پايدالانۋ تۋرالى ءتيىستى تاپسىرمالار بەردى.