سان عاسىردان سۇرلەۋ سالىپ، ادام بالاسىمەن بىرگە جاساسىپ، جانىنىڭ رۋحاني ازىعى بولىپ كەلە جاتقان ونەردىڭ ءبىرى – تەاتر. ادامعا سانا ءبىتىپ، قيالداۋ مۇمكىنشىلىگىنە يە بولدى-اۋ دەگەن زامانداردان، ءوز ومىرىنە كوز جىبەرىپ، كوكەيىندەگىسىن ايتار كوركەم ونەرىنىڭ ورنى – ساحنا. ءدال وسى قۇدىرەتتى ساحنا ونەرىنىڭ ەرەكشە ءتۇرى، قوعام مەن ادام ومىرىندەگى ورنى بولەك سالاسى – قۋىرشاق تەاترى.
جاڭاشىلدىققا جانى قۇمار ساحنانىڭ بۇل سالاسى، جالپى تەاتر ونەرىنە جۇكتەلەر قوعامدىق سالماقتى تەڭ تۇرعىدا كوتەرىپ كەلە جاتقاندىقتان، قۋىرشاق تەاترىنىڭ قوعامداعى ماڭىزىنىڭ زور ەكەندىگى الدەقاشان دالەلدەنگەن. رەسپۋبليكامىزداعى ەڭ ءىرى ونەر ۇجىمدارىنىڭ ءبىرى بولىپ سانالاتىن الماتى قالاسىنىڭ مەملەكەتتىك قۋىرشاق تەاترىنىڭ بۇگىندە 83 جىلدىق تاريحى بار. ونەر وشاعى الەمدىك شىعارمالاردى انا تىلىمىزدە ساحنالاۋىمەن قاتار، تالانتتى ارتيستەر مەن قۋىرشاق شەبەرلەرىنىڭ، رەجيسسەرلەردىڭ، سۋرەتشىلەردىڭ بىرنەشە تولقىنىن تاربيەلەپ شىعاردى. سەكسەن ءۇش جىلدىق شىعارماشىلىق ءومىردىڭ شىعارماشىلىق جولى ءارقيلى بولعانىمەن، قوعامدىق ماڭىزى وتە زور بولدى. العاشىندا بالالار تاربيەلەۋ ءۇشىن اشىلعان بۇل ۇجىم، ۇلكەن شىعارماشىلىق ىزدەنىستەر مەن كوپتەگەن جاڭاشىل قويىلىمداردى ساحناعا شىعارۋدىڭ ناتيجەسىندە، بالالار تەاترى دەگەن شەڭبەردەن شىعىپ، قازاق ساحنا كەڭىستىگىندە وزىندىك ورنىن قالىپتاستىردى.
بۇگىنگى تاڭدا تالاي رەسپۋبليكالىق، حالىقارالىق فەستيۆالدەردى باعىندىرىپ جۇرگەن ونەر ۇجىمى «رۋحاني جاڭعىرۋ» باعدارلاماسى اياسىندا گاسترولدىك ساپارلاردى دا ءجيى ۇيىمتاستىرىپ، وزگە قالالاردىڭ ونەر سۇيەر جاندارىنا قىزىقتى ءارى قىزعىلىقتى قويىلىمداردى تارتۋ ەتۋدى داستۇرگە اينالدىرعان. وسى ماقساتتا ا.ج. 23-24 ماۋسىم كۇندەرى ارۋ قالا الماتىنىڭ استانا قالاسىنداعى مادەني كۇندەرى اياسىندا مەملەكەتتىك قۋىرشاق تەاترى كەزەكتى گاسترولدىك ساپارىن ۇيىمداستىرىپ، ەلوردالىقتار مەن قالا قوناقتارىنىڭ نازارىنا تەاتر رەپەرتۋارىنداعى ۇزدىك قويىلىمدار جول تارتادى.
نەگىزگى باعدارلاما بويىنشا ونەر ۇجىمى 23، 24 ماۋسىم كۇندەرى ساعات 10:00-دە ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىنىڭ ساحناسىندا كىشكەنتاي بۇلدىرشىندەر نازارىنا اسەم ساز بەن اۋەزدى انگە قۇرالعان «ارىستاننىڭ ۇرەيىن قالاي ەمدەيمىز؟» (اۆت. م.دياچيەۆا، رەج. ك.اندرەيەۆا)، ال ەرەسەكتەرگە ساعات 14:00، 15:00-دە ەتنواۋىل ۇلتتىق-مادەني كەشەنىنىڭ ساحناسىندا پوەزيانىڭ شىڭىنا جەتكەن م.ماقاتايەۆ جىرلارى ارقىلى تەاتر ارتيستەرى قۋىرشاقتارمەن بىرگە ءومىردى ءسۇيۋدىڭ عاجايىپ ۇلگىسىن كورسەتەتىن «مەن دەپ ويلا...» (رەج. م.تاۋەكەلوۆا) قويىلىمىن ۇسىنادى.
سونداي-اق، 23 ماۋسىم كۇنى ساعات 19:00-دە ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىنىڭ ساحناسىندا زاڭعار جازۋشى ش.ايتماتوۆتىڭ «قۇس جولى» پوۆەسىنىڭ جەلىسىمەن ساحنالانىپ، قاتپارلى پاراقتاردان كيەلى ساحناعا قۋىرشاقتار بەينەسىندە جول تارتقان «انا – جەر انا» (اۆت. ش.ايتماتوۆ، رەج. د.جۇمابايەۆا) تراگەدياسى، 24 ماۋسىم كۇنى ساعات 19:00-دە قانشاما عاسىر اعىنى وتسە دە، ءومىردىڭ كىلتىن ۇستاپ، قۇندىلىعىن جوعالتپاعان بۇگىنگى تاڭداعى انا مەن بالا بايلانىسىن سۋرەتتەيتىن «انا جۇرەگى» (اۆت. ە.يونوۆ، رەج. ا.زايسيەۆ) قويىلىمى كورەرمەن نازارىنا ۇسىنىلماق.
ارۋ استانا –تاۋەلسىزدىكتىڭ سيمۆولى، ەۋرازيا جاۋھارى. مەملەكەتتىك قۋىرشاق تەاترىنىڭ ۇجىمى ەلوردانى مەرەيلى 20 جىلدىق مەرەيتويىمەن قۇتتىقتاي وتىرىپ، قالا تۇرعىندارى مەن قوناقتارىن تاڭعاجايىپ قۋىرشاقتاردىڭ ونەرىنەن رۋحاني ءلاززات الىپ، جان سارايلارىنا قۋانىش سىيلاۋعا شاقىرادى.
