باتىس قازاقستان وبلىسى اكىمدىگىنىڭ باستاماسىمەن «ازاماتتارعا ارنالعان ۇكىمەت» مەملەكەتتىك كورپوراسياسى كورسەتىلەتىن قىزمەتتەردىڭ پرواكتيۆتى ءادىسى بويىنشا پيلوتتىق جوبانى جۇزەگە اسىرا باستاعان بولاتىن. ايتا كەتسەك، بۇل  قىزمەتتى ءبىرىنشى بولىپ بالا تۋعان اتا-انالار پايدالانعان ەدى. ورالدىق ءاليا كارىموۆا ەسىمدى جاس انانىڭ ايتۋىنشا، مەملەكەتتىك قىزمەت كورسەتۋدەگى جاڭا ءتاسىلدىڭ ءتيىمدى تۇستارى كوپ. جاڭا بوسانعان انالار «ەلەكتروندى ۇكىمەت» پورتالىنا تىركەلگەن جاعدايدا بارلىق قاجەتتى قۇجاتتاردى sms-حابارلاما جىبەرۋ ارقىلى راسىمدەي الادى. ياعني اقپاراتتىق جۇيەلەردىڭ بىرىگۋىنىڭ ارقاسىندا جاڭا تۋعان ازاماتتى تىركەۋ بويىنشا ءوتىنىش اۆتوماتتى تۇردە كەلەتىن بولادى. بالا ومىرگە كەلىسىمەن ونىڭ اتا-اناسىنا sms-حابارلاما ارقىلى قۇتتىقتاۋ كەلىپ، ءسابيدى تىركەۋ بويىنشا مەملەكەتتىك قىزمەتتى الۋ ۇسىنىسى جاسالادى.

-«ەلەكتروندىق ۇكىمەت پورتالى» بارلىق مالىمەتتەردى ءتۇرلى مەملەكەتتىك ورگانداردىڭ اقپاراتتىق جۇيەلەرىنەن جيناپ، ال وزگە دەرەكتەردى sms-حابارلاما ارقىلى اتا-انادان سۇرايدى. بۇعان دەيىن بالا تۋعاننان كەيىن اتا-انالار بالانى تىركەۋ، كۋالىك الۋ، جاردەماقى تاعايىنداۋ جانە بالاباقشاعا كەزەككە قويۋ ءۇشىن حالىققا قىزمەت كورسەتۋ ورتالىقتارىنا بارۋى ءتيىس بولاتىن. پرواكتيۆتى قاعيداتتىڭ ىسكە قوسىلۋىنا بايلانىستى ەندى فرونت-وفيستەرگە بارۋدىڭ، ءتىپتى ەلەكتروندىق ۇكىمەت پورتالىنا جۇگىنۋدىڭ دە قاجەتى جوق. بارلىق قاجەتتى قىزمەتتەردى تۇرعىندار sms-حابارلاما ارقىلى الا الادى. ءبىراق sms-حابارلاما الۋ ءۇشىن ازاماتتار كەز-كەلگەن حقكو-عا بارىپ، وزدەرىنىڭ تەلەفون نومىرلەرىن پورتالداعى جەكە كابينەتتەرىندە بەكىتۋى ءتيىس»، – دەيدى بقو «حالىققا قىزمەت كورسەتۋ ورتالىعى» دەپارتامەنتىنىڭ ديرەكتورى مارات باسساروۆ.

وسى قىزمەتتىڭ كومەگىن العاش بولىپ پايدالانعان ورالدىق جاس اناعا تۋۋ تۋرالى كۋالىك تە تابىس ەتىلگەن ەدى. «ءبىر تەرەزە قاعيداتىن ءومىردىڭ بارلىق سالاسىندا ەنگىزۋ، سيفرلاندىرۋ ۇدەرىسىن ودان ءارى دامىتۋ، ەلەكتروندى ۇكىمەت سالاسىن جەتىلدىرۋ سياقتى مىندەتتەر كەشەگى ەلباسى جولداۋىندا دا كەڭىنەن كورىنىس تاپتى. بۇل سايىپ كەلگەندە ادامداردىڭ التىن ۋاقىتىن ۇنەمدەپ، ءومىر ءسۇرۋ ساپاسىن ارتتىرا تۇسەرى ءسوزسىز»، – دەيدى ماماندار.