اتىراۋداعى 40 جەتىم بالا جانە از قامتىلعان وتباسىلاردىڭ بالالارى جازعى دەمالىستارىن يتاليادا وتكىزەدى.

بالالاردىڭ شەتەلگە بارىپ دەمالۋلارىنا جولدامانى اتىراۋ وبلىسىنىڭ ءبىلىم باسقارماسى قامتاماسىز ەتۋدە، دەپ حابارلايدى اتىراۋ وبلىستىق وڭىرلىك كوممۋنيكاسيالار قىزمەتى.

اتىراۋ قالاسىنىڭ حالىقارالىق اۋەجايىنان 40 جەتىم جانە اتا-اناسىنىڭ قامقورلىعىنسىز قالعان بالالار يتاليانىڭ چەزەناتيكو قالاسىندا ورنالاسقان جازعى دەمالىسقا اتتاندى. بالالاردى قامقورشىلارى مەن دوستارى شىعارىپ سالدى.
يتالياداعى ەكى اپتالىق دەمالىسقا وبلىستىق ءبىلىم بەرۋ باسقارماسى قاراجات بولگەن.

«شاڭىراق» وتباسىلىق تيپتەگى بالالار اۋىلىنىڭ تاربيەلەنۋشىلەرىنە 7 بيلەت بەرىلدى؛ 32 جولداما قالالىق جانە اۋداندىق ءبىلىم بەرۋ بولىمدەرىنىڭ قامقورشى جانە قامقورلىقتاعى بالالارعا، سونداي-اق، پاتروناتتىق تاربيەدەگى بالالارعا، 1 جولداما №4 وبلىستىق ساناتورلىق-ينتەرناتىنىڭ تاربيەلەنۋشىسىنە بەرىلدى.

بالالاردى اتىراۋ قالاسىنداعى №12 ورتا مەكتەپتىڭ مۇعالىمدەرى، دارىندى بالالارعا ارنالعان وبلىستىق مەكتەپ-ينتەرناتىنىڭ ۇستازدارى، سونداي-اق اعىلشىن ءتىلىن جەتىك مەڭگەرگەن اعا وقىتۋشىلار جەتەكشىلىك ەتىپ بارادى.

مەن ءۇشىن بيىلعى جازعى دەمالىسىم وتە قىزىقتى بولاتىنىنا وتە قۋانىشتىمىن. بۇل ساپاردا جاڭا دوستار تابامىن، اعىلشىن ءتىلىن تەرەڭىرەك مەڭگەرىپ، ساۋلەت ەسكەرتكىشتەرىن كورەتىن بولامىن. يتالياداعى ۇمىتىلماس جانە ادەمى ورىنداردى كورەمىن. ساپاردان العان اسەرىم، مەن ءۇشىن ءومىر بويى ەسىمدە قالاتىن بولادى،- دەيدى № 12 ورتا مەكتەپتىڭ وقۋشىسى اسەماي نۇرجىگىتوۆا.

بالالاردىڭ «ادجيپ كاراچاگاناك ب.ۆ.» كومپانياسىنىڭ الەۋمەتتىك جاۋاپكەرشىلىگىنە بايلانىستى شەتەلدىك لاگەردە دەمالۋعا مۇمكىندىكتەر الدى. يتاليادا جازعى دەمالىس كۇندەرى 3 شىلدەگە دەيىن جالعاسادى.