بولاتبەك بايماعانبەتوۆ ورالدىقتارعا اعاشتان ويىپ جاسالعان «قازاقتىڭ باتىرى» جانە ۇلتتىق كيىممەن ورنەكتەلگەن «ارۋ» مۇسىندەرى ارقىلى جاقسى تانىس.
بۇل جولى كەيىپكەرىمىز ورال قالاسىنداعى ىقسانوۆ كوشەسىندە جەكە كاسىپكەردىڭ تاپسىرىسى بويىنشا ءۇشىنشى جۇمىسى – «قانسونار» كومپوزيسياسىن جاساۋ ۇستىندە ەكەن. يدەيانى تاپسىرىس بەرۋشىگە اۆتوردىڭ ءوزى ۇسىنىپتى. اتا-بابامىزدىڭ قانسوناردا اڭعا شىققان كەزىن تۇتاستاي سۋرەتتەگەن كەشەننىڭ ۇقتىرارى مول. رۋحاني جاڭعىرۋ – دەگەن وسى بولار. الىستان «مەن مۇندالايتىن» ادەمى كەشەندى جول بويى وتكەندەر سۇيسىنە تاماشالاۋدا. تىپتەن، سۋرەتكە ءتۇسىپ جاتقاندار دا بولدى. وسىدان-اق اۆتوردىڭ ەڭبەگىنىڭ قۇندىلىعىن، حالىقتىڭ قولونەردى قانشالىقتى باعالايتىنىن باعامداۋعا بولادى. بۇل كومپوزيسيانى جاساۋعا بەكبولات ءبىر اي جارىم ۋاقىت جۇمساپتى. ونىڭ ايتۋىنشا، شىعارماشىلىق جۇمىس بولعاندىقتان، اسىقپاي ويۋ-ورنەكپەن بەزەندىرىپ، ءار بولشەگىنە اسا ءمان بەرەدى. ەڭ باستىسى – ساپا. تەرەك كەسىندىسىنە بايلانىستى ءمۇسىننىڭ قيمىلىن دا وزگەرتۋگە تۋرا كەلەدى.
– العاشقى ۇلكەن جۇمىسىم دوستىق داڭعىلىنداعى «يۋبەلەينىي» ايالداماسىنداعى قازاق حاندىعىنىڭ 550 جىلدىعىنا ارنالعان باتىردىڭ ءمۇسىنى. ودان كەيىن «تيپوگرافيا» ايالداماسىنداعى سىنعان ەسكى اعاشتان قازاقتىڭ ارۋ قىزىنىڭ بەينەسىن سومدادىم. مۇنداي تامىرى تەرەڭگە تارتقان اعاشتان جاسالعان مۇسىندەردىڭ ەرەكشەلىگى – ەشقاشان سولمايدى، ىلعال تارتىپ تۇرادى. سوندىقتان جارىلمايدى. بۇل تاجىريبە ەۋروپادا دامىعان. قالاداعى ەسكى اعاشتاردى كەسىپ تاستاعانشا، وسىنداي مۇسىندەر جاساسا، كەرەمەت ەمەس پە؟ كوپتەن ويىمدا جۇرگەن كومپوزيسيانى بۇل جولى ىسكە اسىرۋعا كاسىپكەردىڭ ۇسىنىسى تۇرتكى بولدى. ىرگەدەگى بالاباقشاعا قاتىنايتىن بالعىندار جانۋارلاردىڭ ءمۇسىنىن كورىپ، كۇن سايىن ماز-مەيرام بوپ وتەدى. كولىك جۇرگىزۋشىلەرى ارنايى توقتاپ، العىس ايتىپ جاتادى. ءبىر قىنجىلاتىنىم، وسىدان ءۇش جىل بۇرىن جاساعان باتىردىڭ ءمۇسىنىن بىرەۋلەر ءبۇلدىرىپتى. وسى جۇمىسىمدى اياقتاعان سوڭ سونى قايتا جوندەپ، بوياۋ ويىمدا ءجۇر، – دەيدى 38 جاسار ءمۇسىنشى. بىزبەن اڭگىمەلەسۋ بارىسىندا ول جۇمىسىن جان-تانىمەن جاساپ وتىردى. اعاشتان ءتۇيىن تۇيگەن شەبەر بالا كەزىنەن ءتۇرلى جان-جانۋاردىڭ بەينەسىندەگى ويىنشىقتاردى ءوز قولىمەن جاساپ ويناپتى.
ءبىر تاڭقالعانىمىز، تالانتتى جان سۋرەت سالۋعا جوق. ءبىراق، ەشقانداي ەسكيز جاسامايدى، ويىندا نە بار سونى جۇزەگە اسىرادى. جانۋاردىڭ تۇرىسىن، اياعىن تاعى باسقا مۇشەلەرىن تەرەكتىڭ كەسىندىسىنە بايلانىستى وزگەرتىپ وتىرادى ەكەن. تەرەككە قاراپ-اق نە جاساۋعا بولاتىنىن لەزدە شەشەدى.
بولاتبەكتىڭ تۋعان جەرى – جالپاقتال اۋدانىنىڭ تالدىقۇدىق اۋىلى. وسى اۋىلدا ورتا مەكتەپتى ءتامامداعان بوزبالا م.وتەمىسوۆ اتىنداعى بقمۋ جانىنداعى كوللەدجدى قازاق ءتىلى مەن اراب ءتىلى ماماندىعى بويىنشا ءتامامداعان. ءبىراق ءمۇعالىم بولۋعا قۇلقى بولماعان ول وسى سالاعا كوڭىلى اۋىپ تۇراتىنىن جاسىرمايدى. – تۋعان اۋىلىمدا تەرەك جوق بولاتىن. جازىق دالادا ءوستىم. كەيبىرەۋلەر «ءسىز تەرەگى كوپ، ورماندى القاپتا وسكەن بولارسىز» دەپ بولجام جاساپ جاتادى، – دەگەن ول ارعى اتاسى جايناق اعاش شەبەرى بولعانىن، بۇل ونەردىڭ قانمەن بەرىلگەنىن ايتادى. ويتكەنى، بولاتبەك بەلگىلى مۇسىنشىلەردى تانىمايدى دا، نە ەلىكتەپ كورمەپتى. اكەسى تولەگەن مەن اناسى باقىتجامال ون بالانىڭ كەنجەسىنىڭ شەبەرلىگىمەن ەلدى سۇيسىنتەرىنە ءاۋ باستان سەنىپتى. ويتكەنى، مەكتەپ جاسىنان-اق بەلسەندى، اقىندىعى دا بار، ءتۇرلى قويىلىمداردا باستى رولدەردى سومدايتىن ءارتىس، شەبەرلىگى ءوز الدىنا ءبىر توبە «سەگىز قىرلى، ءبىر سىرلى» بالانى ۇستازدارى دا ۇنەمى اتا-اناسىنا ماقتاپ جۇرگەن.
